Ante a gravidade de situación xerada polo Instituto Galego de Vivenda e Solo (IGVS) e a Xunta co desaloxo dunha familia compostelá en situación de exclusión social, a concelleira de Políticas Sociais do Concello de Santiago, Concha Fernández, e o coordinador do grupo de traballo de PP.SS. de Compostela Aberta, Duarte Crestar, reuníronse no Parlamento de Galicia con representantes de En Marea, do PSdeG e do BNG.
Concha Fernández explicou a situación desta familia e as graves consecuencias que este precedente pode ter en moitas outras situacións semellantes. Como xa dixemos anteriormente, a Xunta e o IGVS non poden comportarse como o peor dos bancos deixando a esta familia na rúa e agravando a situación na que se atopa sen darlle unha alternativa de realoxo. É obriga dos poderes públicos promover as condicións para facer efectivo o dereito a unha vivenda digna.
O caso desta familia é especialmente grave e complexo, con máis de 200 actuacións documentadas polo Concello no último ano e medio. Pero non é un caso único e marca un grave precedente. É imposible que familias nesta situación atopen vivenda no mercado libre e, por iso, Xunta e IGVS non poden escapar da súa responsabilidade e teñen a obriga de dotarse dun parque de vivendas suficiente, diverso e adecuado ás distintas características actuais..
No seguinte audio podes escoitar as declaracións de Concha Fernández despois de coñecerse o desafiuzamento.
