Este martes, La Voz de Galicia publica que a Xunta multa ao Concello de Santiago polo vertedoiro de Aríns, clausurada, pero non selada no 2011, durante o goberno de Conde Roa.
Unha vez máis, o Goberno de Compostela Aberta e toda a veciñanza de Santiago teñen que asumir a factura da nefasta política ambiental do goberno do PP de Conde Roa e do ex conselleiro de medio ambiente Agustín Hernández.
Non parece tampouco casual que isto chegue nun momento no que a cidadanía estea mobilizándose en toda Galicia pola política medioambiental da Xunta seguida en MIramontes, Teo ou pola megamina de Touro-O Pino.
Precisamente Martiño Noriega falaba hai uns días da nefasta política autonómica que promove reactivar antigos proxectos mineiros como o de Touro-O Pino ou esconder en supostas plantas de tecnosolos como a de Miramontes verquidos que incumpren a normativa, tal como está sacando á luz a mobilización veciñal na Grixoa.
Por iso nos sumamos ás reivindicacións veciñais contra a pranta de Miramontes ou a manifestación prevista para o próximo domingo contra a megamina de Touro-O Pino. Non podemos converter o país no vertedoiro do Estado nin reactivar accións mineiras que forman parte dun pasado máis propio de épocas coloniais.