Un ano máis, Compostela clama ‘En negro #ContraAsViolencias machistas’.
Arredor de 3.000 comercios e colectivos sociais, máis de 80 concellos, 3 deputacións e colexios e institutos de toda Galicia implicáronse nunha campaña que se ben naceu no 2015 impulsada polo goberno de Compostela Aberta, dous anos despois xa desborda por completo os límites das institucións nun ‘tsunami’ que implica a toda a veciñanza.
Un ano máis, vemos que este é o motivo do seu éxito, porque por riba de diferenzas e cores, por riba dos irresponsables relatos de parte que algúns teiman en colocar sen éxito na axenda, a campaña non é dun Concello nin dun goberno, é da xente que a fai súa, que tece rede e se expresa e posiciona fronte a barbarie machista, pola igualdade real e o feminismo.
Sentimos orgullo de cidade e de país vendo a mobilización destes días. Pero despois do #25N, chega o #26N. A loita #ContraAsViolencias non pode ser, nin será, flor dunha semana. Seguiremos mobilizados contra as actitudes machistas, a falta de recursos na persecución da violencia de xénero, a culpabilización das vítimas, os silencios cómplices ou a desidia institucional para colocar este tema onde corresponde, como unha máxima prioridade social e política, unha cuestión de Estado que precisa da fraternidade e da colaboración de todas e todos.
E hoxe queremos agradecer de forma moi especial o traballo e enorme esforzo de Marta Lois, Natalia Paleo, Lucia Canoura, Uqui Permui e a tanta e tanta xente que fixo posible que Compostela e Galicia se tinguinsen de negro #ContraAsViolencias.