O grupo parlamentario de En Marea presentará emendas aos orzamentos da Xunta para 2019 nas que pedirá un incremento de máis de 14 millóns de euros nas partidas destinadas a Santiago. As deputadas Luca Chao e Flora Miranda, o deputado Antón Sánchez, e a tenente de alcalde de Compostela, María Rozas, presentaron hoxe as propostas “que reiteran vellas demandas como o incremento da partida da Capitalidade e a achega ao Consorcio, e incorporan novas peticións, fundamentalmente en materia social”.

María Rozas reiterou que “os orzamentos da Xunta son claramente insuficientes no que ten que ver con Santiago, e volven ignorar demandas históricas da capital do país”. Entre elas, a tenenta de alcalde citou o incremento da partida da Capitalidade, que se mantivo en 2,3 millóns de euros “cando estudos do ano 2008 cifraban xa en 5,5 millóns de euros o custo que lle supón a Santiago exercer de capital da comunidade”. Tamén reclamou o aumento da achega que a Xunta fai ao Consorcio “que debera subir ata os 6,5 millóns de euros cando se achega o Xacobeo de 2021, unha cita na que o organismo interadministrativo debe adquirir unha especial relevancia”.

Equipamentos públicos e políticas sociais
Nas emendas que En Marea presentará aos orzamentos da Xunta no que tén que ver con Santiago tamén se reclama “que o presidente Feijóo cumpra a súa palabra e incorpore ás contas unha partida para a execución da Cidade da Raqueta, que estimamos en 400.000 euros”. Tamén se manteñen peticións de anos anteriores e non atendidas como a ampliación do Conservatorio de Música (200.000 euros), a construción da nova Escola Oficial de Idiomas (500.000 euros) ou o centro de saúde de Conxo (2.000.000 de euros).

En Marea tamén solicitará que se inclúa nos orzamentos, cunha partida de dous millóns de euros, o novo aparcamento do CHUS, nunha parcela próxima ao CITIUS que o Concello xa ten ofrecida á Xunta. A deputada Flora Miranda incidiu en que “o hospital de Santiago non é na actualidade accesible para as 400.000 persoas que residen nunha área sanitaria moi ampla, que vai desde Muros ata Valga”. Garantir o acceso ao CHUS forma parte da resolución dos problemas de saúde das persoas, porque todo forma parte dun concepto integral da saúde”.

En materia de políticas sociais, as emendas de En Marea tamén recollen demandas que vén formulando o Goberno local de Compostela Aberta para a creación dun parque de vivendas do IGVS para persoas sen fogar (500.000 euros), a construción dun Centro de Día para Menores (500.000 euros) ou para a creación dun recurso habitacional para as mulleres vítimas da violencia machista (500.000 euros). Por último, o grupo parlamentario reclamará unha partida de 500.000 euros, “para dotar de contido ao acordo para a reindustrialización empresarial asinado en xaneiro de 2017 entre o Cocnello, o IGVS, o IGAPE, a Universidade de Santiago, a Cámara de Comercio e a Área Empresarial do Tambre”.

Orzamentos propagandísticos
A deputada Luca Chao explicou que “En Marea vén mantendo xuntanzas por diferentes concellos galegos, que constatan que os orzamentos da Xunta para 2019 son insuficientes, continuistas, neoliberais e propagandísticos”. Nesa liña, insistiu en que “as contas presentadas por Alberto Núñez Feijóo nin serven para mellorar a vida das persoas nin son as contas da recuperación económica, porque únicamente entenden o crecemento como o reparto das miserias”.

Podes consultar aquí o documento coas  Emendas orzamentos Xunta

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies