O concelleiro de Educación e Cidadanía, Manuel Dios, manterá no día de hoxe diversas xuntanzas en Barcelona nas que se debaterá o modelo educativo nas cidades do cambio. Entre outros auntos, compartirán experiencias sobre o proxecto Ejuso de educación en xustiza social.
Convidado polo Comisionado de Educación e Universidades, Miquel Ángel Essombra, o concelleiro de Educación e Cidadanía participará nunha Xornada Temática que terá lugar na sede do Instituto Municipal de Educación do Concello de Barcelona. Están convidadas as cidades de Santiago, Zaragoza, Cádiz, Madrid e Barcelona, que é a anfitriona.
No Encontro educativo das cidades do cambio farán intercambio de experiencias na metade do mandato e coñecerán o proxecto EJUSO de investigación e promoción da Xustiza Social en Educación Primaria e Secundaria.
Entre os seus obxectivos están investigar a representación do concepto de xustiza que teñen os estudiantes de primaria e de secundaria; fomentar o pensamento crítico e analítico do alumnado nas contornas máis próximas e a nivel global; aumentar os coñecementos e habilidades en materia de xustiza social e, por último, consensuar un concepto común de xustiza social baseado nas actitudes, comportamentos e principios nos que sustentar a convivencia democrática.
As cidades do cambio analizarán tamén diversas propostas de colaboración futuras.
