Dende Compostela Aberta queremos denunciar a prisión preventiva que sofren varios membros do Govern da Generalitat, elixido democraticamente nas urnas. Estas accións encádranse no marco da deriva autoritaria do Réxime do 78, que non entende que os conflitos no século XXI deben resolverse con máis democracia, e non recortando dereitos e liberdades recollidos no Título I da Constitución.
O 21-D non é unha data electoral normal: a aplicación do 155, o encarceramento de rivais políticos e as ameazas da Fiscalía en relación á ilegalización de partidos políticos independentistas fan que entremos nun marco de excepción. Dentro del, consideramos que o conflito político seguirá latente, xa que non existen saídas que non pasen por respectar a libre vontade do pobo catalán.
Lamentamos que o Partido Popular e Ciudadanos, coaligados cos principais poderes económicos e mediáticos, atopen un socio estable no PSOE para aplicar estas medidas manifestamente autoritarias e regresivas e antidemocráticas. Os mesmos que noutros casos nos poñen difícil establecer apoios estables cando se trata de mellorar a vida da veciñanza.
Facemos un chamamento a participar en todas as manifestacións cívicas que soliciten marcos de diálogo na resolución deste conflito, a recuperación dos dereitos civís conculcados e a liberdade das persoas presas por defender un mandato popular emanado das urnas. Nós, ao contrario doutras, non lle temos medo á democracia.