Compostela Aberta amosa a súa satisfacción tras a comunicación ao alcalde Martiño Noriega de que Santiago contará cun novo xulgado do Social, desmentindo o anunciado a semana pasada.
Esta petición unánime da cidade será finalmente atendida tal como lle foi confirmado este martes a Martiño Noriega por parte do Delegado do Goberno en Galicia, Javier Losada.

A comunicación chega días despois de que o Ministerio de Xustiza negara a creación da cuarta sala do Social en Santiago e de que se constituíra unha fronte común institucional e social na cidade para que se atendera esta esixencia. Martiño Noriega mostrouse convencido de que “o cambio de criterio do Ministerio de Xustiza ten que ver coa resposta unánime da cidade diante dunha decisión que resultaba inexplicable”.

Este anuncio do Delegado do Goberno produciuse horas despois de que o alcalde e os voceiros dos diferentes grupos da Corporación municipal se reunisen co decano do Colexio de Abogados de Santiago, Francisco Rabuñal, o decano do Colexio de Procuradores, Fernando González-Concheiro, e o decano da Facultade de Dereito, Gumersindo Guinarte, para “mostrar esta fronte común que existe na cidade para reclamar que o Ministerio de Xustiza recapacitase e dera luz verde á creación do xulgado do Social”.

Tal e como lle trasladou Martiño Noriega a Javier Losada, “non se entendía que o Ministerio desoíra a petición deste órgano, que se baseaba na carga de traballo que soportan os xulgados do Social de Santiago, con casos que acumulan atrasos de ata tres anos”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies