A Asemblea de Compostela Aberta votou por aclamación a continuidade de Martiño Noriega baixo o compromiso persoal de iniciar un proceso de transición. O alcalde en funcións agradeceu a axuda de toda a xente que durante este tempo fixo posible a existencia deste espazo de unidade popular tanto na institución como na rúa. “Os resultados son moito máis negativos do que agárdabamos, non imos escondernos. Pero non esquezamos que nos debemos a máis de 10.000 persoas que confiaron en nós.”
Noriega insistiu en que a posta a disposición na Asemblea da súa acta como concelleiro non era retórica e que a súa continuidade terá un horizonte limitado no tempo que sirva dentro dun proceso de transición. “Este é un espazo que segue en construción e que ten que seguir consolidándose nunha nova etapa diferente.”
Durante a Asemblea tamén se iniciou unha valoración das causas tanto internas como externas que puideron estar detrás do mal resultado nas eleccións do pasado 26 de maio que levaron a Compostela Aberta a pasar de 10 a 5 concelleiras e a conseguinte perda do goberno da cidade. Aínda así, tal como tamén fixo Martiño Noriega, lembrouse que Compostela Aberta segue a ser un espazo chave para a gobernabilidade da cidade, aínda descartándose a posibilidade dun goberno de coalición co PSOE a partir do 15 de maio, data da investidura e formación da nova corporación.