A Asemblea de Compostela Aberta aprobou por ampla maioría a proposta da Coordinadora para relanzar o espazo político galego da Unidade Popular.
Tal como se expón nesta proposta, os retos electorais do próximo 2019 esixirán un enorme esforzo e vontade de colaboración de todos os axentes integrantes en prol do ben común e dos obxectivos políticos de transformación social, partindo da lóxica da cooperación entre as partes.
Para poder afrontar estes retos con garantías, e coa responsabilidade coa que nos debemos á cidadanía que ten confiado en nós, semella imprescindible o relanzamento do espazo político galego da unidade popular e constituír un espazo de traballo conxunto para as organizacións e mareas.
Neste contexto e con estes obxectivos, os acordos aprobados polo conxunto da Asemblea son:
1 . Propor que se constitúa unha Mesa da Confluencia -contando, como mínimo, coa representación dos partidos políticos participantes na primeira coalición, incluídas ás tres mareas gobernantes e a actual En Marea- co obxectivo de garantir que todas as partes se corresponsabilicen e participen do espazo político.
2 . Tendo en conta o anterior, solicitar que se anticipe a nova elección do Consello das Mareas e se convoque a súa renovación xa no mes de setembro -evitando a coincidencia coa precampaña electoral- como órgano de dirección política e coordinación do espazo político.
3 . Mandatar á Coordinadora de Compostela Aberta para impulsar as iniciativas políticas que teñan por obxectivo conseguir os dous puntos anteriores e relanzar a unidade popular.
No seguinte enlace podes consultar o documento completo aprobado pola Asemblea.
