O alcalde e candidato á reelección, Martiño Noriega, e a concelleira de Políticas Sociais, Concha Fernández, reuníronse esta xoves cos responsables da Coordinadora Galega de ONGDs. A xuntanza serviu para facer balance do mandato e para recoller as propostas que a entidade lle está a facer a todas as organizacións política que concorren ás eleccións municipais en todas as cidades galegas.
A Coordinadora recoñeceu que Compostela Aberta xa tén moito camiño andado nestes catro anos e, de feito, xa cumpriu parte das demandas da organización. Temos feitas dúas convocatorias por concorrencia competitiva das axudas de cooperación ao desenvolvemento, temos creado o Consello Municipal de Cooperación, temos impulsado o programa Compostela + Solidaria como campaña integral de sensibilización e educación da cidadanía, e témonos dotado dun modelo pioneiro de rendición de contas sobre os logros acadados na loita contra a pobreza.
Pero aínda quedan demandas da Coordinadora Galega de ONGs por cumprir, relacionadas co incremento do orzamento destinado á cooperación, coa dotación de fondos extraordinarios para accións humanitarias ou coa elaboración dun Plan Estratéxico de cooperación ao desenvolvemento.
Martiño Noriega e Concha Fernández recolleron estas demandas e comprometéronse a traballar no seu cumprimento no próximo mandato.
