- O alcalde de Santiago, Martiño Noriega, salientou a “volta á normalidade” e a “recuperación da confianza” da cidadanía na administración local.
Foto de Martiño Noriega: santiagodecompostela.org.
O alcalde de Santiago realizou hoxe un balance dos cen primeiros días de goberno de Compostela Aberta. Martiño Noriega salientou á “volta á normalidade” e a “recuperación da confianza” da cidadanía na administración local froito da interlocución cos barrios e parroquias a través do seu tecido asociativo. Recolléronse, segundo dixo, as súas necesidades e demandas, moitas delas pendentes desde antes do ano 2011.
Noriega tamén se referiu á mellora das relación internas no Concello, e á elaboración dunha auditoría interna para coñecer a situación das arcas municipais. Como aspecto “positivo” destacou a liquidez das contas. Na parte negativa, sinalou que os informes desvelaron o incumprimento do teito de gasto. Nesta liña, incidiu na vontade de transparencia do executivo local na xestión financeira que se está a traducir, segundo explicou, en medidas como a publicación de informes trimestrais.
No documento Cen días de goberno pódense consultar as accións de goberno máis concretas, clasificadas por concellarías.