Compostela Aberta pedirá no próximo Pleno que o Goberno desenvolva unha programación específica, en colaboración cos colectivos e traballadores culturais da cidade, “como estratexia de rexeneración da calidade de vida nas zonas da cidade afectadas polo impacto do turismo masivo”. A concelleira Branca Novoneyra mostrou o seu convencemento de que “a cultura pode ser unha ferramenta para recuperar os trazos identitarios da vida de Santiago, que están a ser borrados en moitos ámbitos por mor da sobreocupación por parte dos turistas e visitantes”.
Branca Novoneyra lembrou que nos útlimos meses “incrementouse o sentimento de frustración de moitos veciños e veciñas, que veñen avisando do impacto negativo do turismo sobre a súa vida cotiá”. Esta situación dase especialmente na zona vella “onde hai rúas que os residentes perciben como ocupadas polos turistas, como poden ser Carretas, o Franco, as prazas do contorno da Catedral, a rúa de San Pedro ou mesmo a Praza de Abastos”. A concelleira de Compostela Aberta explicou que “fronte a ese sentimento, é preciso aproveitar as potencialidades da actividade cultural como elemento de cohesión social, na liña oposta á tendencia que percibimos na que cada vez se foxe máis de programar nestes espazos”. Nesa liña, apuntou que a propia UNESCO vén de publicar un informe, titulado “Repensar as políticas para a creatividade: propoñer a cultura como un ben público global”, no que sinaloa que “no ámbito das cidades, a cultura e a creatividade cada vez máis percíbense como recursos para o desenvolvemento local, o que favorece o crecemento económico e a innovación e aumenta o atractivo e a cohesión social, así como a participación na vida cultural”. Ademais, Novoneyra apuntou que o último informe da cultura municipal de Santiago tamén se refería “á importante marxe de mellora do conxunto da oferta cultural do municipio á hora de contribuir á estratexia turística local”.
Para Branca Novoneyra, esta programación cultural específica “contribuiría a rexenerar as zonas sobresaturadas de turistas, ao tempo que sería unha fórmula máis para que o sector cultural de Santiago se adapte a contexto derivado da pandemia da Covid-19 e da estanflación da crise enerxética e se garanta o dereito de acceso á cultura de todos os veciños e veciñas”.
PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA QUE SE PLANIFIQUE A ACCIÓN CULTURAL COMO ESTRATEXIA DE REXENERACIÓN DAS ZONAS AFECTADAS POLA ACELERACIÓN DO IMPACTO DE TURISMO SEN CONTROL
