- A concelleira de CA lamenta que se perda a oportunidade de promocionar aos artistas locais nas festas, denuncia a ausencia de propostas para a xente moza, e bota en falta grandes nomes do panorama internacional
Branca Novoneyra lamentou hoxe “a escasa ambición e a falta de ideas do Goberno, que se traducen nunha programación do Apóstolo pobre e sen un fío condutor claro”. A concelleira de Compostela Aberta criticou que “o cartel é unha oportunidade perdida para proxectar o noso sector cultural local, pero tamén carece de grandes nomes do panorama estatal ou internacional, como sería de esperar nunhas festas na capital de Galicia e que por mor da pandemia non puideron celebrarse nos dous últimos anos”.
Branca Novoneyra lembrou que “Compostela Aberta leva meses reclamando, mesmo no Pleno, que o Goberno aproveitara as festas para proxectar aos artistas locais e para axudar ao rescate dun sector cultural en precario nestes tempos de crise, e é evidente que esta programación do Apóstolo ignora esa petición”. Nesa liña, a concelleira de CA lamentou especialmente que se suprima o escenario do Toural, “que durante o pasado mandato utilizamos precisamente para os concertos de artistas locais e galegos, en colaboración coa asociación de Músicos ao Vivo”. Non se atende, polo tanto, a proposta de Compostela Aberta que se debaterá no Pleno para que se dedique un orzamento de 250.000 euros á programación con artistas locais.
Programa pobre
Para Branca Novoneyra, a programación presentada onte “tamén é moi pobre no que tén que ver coas propostas internacionais, que se reduce ao concerto de Caléxico, porque as outras bandas programadas son de ámbito estatal independentemente a procedencia dos seus estilos musicais”. A maiores, sinalou, algunhas das actuacións programadas xa se puideron ver recentemente nas salas da cidade. A concelleira tamén cuestionou “a ausencia de propostas pensadas específicamente para a xente moza, que non vai atopar neste programa ningunha oferta de música urbana ou doutros estilos cos que se sente máis identificada”.
Do mesmo xeito, Novoneyra alertou sobre “o desequilibrio de xénero desta programación, na que aparecen poucas mulleres artistas”. Para a concelleira, “non abonda con manter os puntos lila, é preciso cumprir co indicador da paridade de xénero en todas as programacións culturais e de ocio para apostar verdadeiramente por unha Compostela Territorio das Mulleres”.
Por último, lamentou que se limite a descentralización das festas “con poucas propostas nos barrios como as que impulsamos durante o pasado mandato”. Pola contra, Branca Novoneyra agradeceu que o Goberno “tivera en conta outra das demandas que levamos meses formulando desde Compostela Aberta para que se inclúan actividades nos parques e zonas verdes de Santiago”.
