A concelleira de Compostela Aberta Branca Novoneyra denunciou hoxe “a absoluta falta de compromiso e de interese do Goberno de Bugallo polas políticas dirixidas á mocidade, que se traduce en que vai finalizar o mandato sen que se teña elaborado o Plan Municipal de Xuventude, sen que se teña impulsado un programa ambicioso e consensuado no Centro Xove da Almáciga, e sen que se teñan deseñado accións transversais para atender as necesidades de emprego, vivenda, educación e acceso á creación cultural das mozas e mozos de Santiago”. Por iso, CA levará ao próximo Pleno unha moción na que insta ao Goberno “a reaccionar, a activar o departamento de Xuventude, e a render contas do feito por esta concellería”.
A moción se que se vai debater no Pleno da próxima semana insta ao Goberno a facilitar información escrita sobre o nivel de execución desagregado das partidas dependentes do Departamento de Xuventude, unha petición que CA xa formulara no Pleno hai xusto un ano; e a transparentar a súa folla de ruta para o desenvolvemento do Plan de Xuventude. Branca Novoneyra lembrou que “xa en 2020 a Corporación aprobara unha proposta de Compostela Aberta para reclamar a elaboración e dotación orzamentaria dun Plan Municipal de Xuventude que implicara transversalmente a todas as áreas do Goberno, este Plan foi finalmente incluído nos orzamentos de 2022 a petición de CA, cunha partida de 35.000 euros para unha primeira fase”.
Centro Xove da Almáciga, “desconectado da mocidade”
Ademais, na moción reclámase que o departamento de Xuventude publique unha convocatoria aberta para que diferentes colectivos de mozos e mozas poidan desenvolver as súas actividades e procesos culturais no Centro Xove da Almáciga durante o primeiro semestre de 2023; e que abra un proceso de diálogo con estes colectivos para elaborar un programa formativo consensuado e ambicioso neste espazo. Branca Novoneyra lembrou que “ao Centro Xove da Almáciga dedícase un orzamento de máis de 140.000 euros anuais, pero como vimos denunciando a súa programación non responde ás expectativas da mocidade, que se sente desvinculada do espazo”. Nese sentido, a concelleira lamentou que “a programación que vén de presentar o concelleiro Rubén Prol demostra a falta de reacción do Goberno fronte ás críticas, e a súa incapacidade para introducir os cambios que se demandan no servizo, e tamén que o edil está desconectado e non fala coa xente da súa idade”. Para Novoneyra, “é incomprensible que un espazo con este orzamento se dedique a pouco máis que ás clases de guitarra e canto”.
Por último, CA demandará no Pleno que o Goberno posibilite a publicación dun catálogo de recursos municipais para que a mocidade de Compostela poida planificar e desenvolver proxectos en rede, “aproveitando todo o territorio municipal e sen esquecer o rural”.
PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA IMPULSAR DE FORMA URXENTE O PLAN MUNICIPAL DE XUVENTUDE E UNHA CONVOCATORIA DE PROXECTOS PARA DESENVOLVELOS NO CENTRO XOVE DA ALMÁCIGA
