Branca Novoneyra urxe ao Goberno local a poñer en marcha o Plan Municipal de Xuventude durante este ano, “para darlle cumprimento a unha das cuestións incluída no acordo asinado entre o PSOE e Compostela Aberta para a aprobación dos orzamentos municipais”, A concelleira de Compostela Aberta lembra que “xa imos con moito atraso, porque xa en decembro de 2020 a Corporación municipal aprobara unha moción con esta demanda”.
Os orzamentos municipais de 2022 inclúen unha partida de 35.000 euros para a redacción do Plan de Xuventude. Dábaselle cumprimento así ao acordo asinado entre o goberno municipal e Compostela Aberta o 18 de xaneiro deste ano 2022, que facía referencia á elaboración do Plan Municipal de Xuventude, porque “a mocidade é un dos sectores poboacionais máis afectados pola pandemia, e urxen respostas, tamén por parte da administración municipal.” Con esta demanda de CA, explicou Branca Novoneyra, “o noso grupo municipal trataba de resolver unha cuestión que o Goberno viña desatendendo, e que xa lle tiñamos reclamado en decembro de 2020 e en decembro de 2021”.
Para Branca Novoneyra, “xa non hai máis escusas para que o Goberno nn poña en marcha os trámites necesarios para desenvolver o Plan Municipal de Xuventude, e moito nos tememos que non lle dea cumprimento a este acordo se non os inicia canto antes, tendo en conta que estamos xa ás portas do verán”. Por iso, a concelleira de CA preguntará no próximo Pleno polos prazos que estima o Goberno “para cumprir o compromiso asinado hai xa cinco meses con Compostela Aberta”.
