- CA pide que as axudas municipais a actividades culturais sexan compatibles cos proxectos europeos, e que non se repitan os erros da pasada convocatoria
Compostela Aberta solicitará no próximo Pleno a posta en marcha dun programa de formación dirixido a empresas, asociacións e persoas vinculadas co tecido cultural, co obxectivo de facilitarlles o acceso ás convocatorias de fondos europeos Next Generation. A concelleira Branca Novoneyra incidiu en que “a delicada situación que atravesa o sector desde o comezo da pandemia obrígao a captar financiamento en distintos niveis institucionais para garantir a súa supervivencia e, ao tempo, o dereito de acceso á cultura da cidadanía”.
Branca Novoneyra lembrou que o da cultura foi un dos sectores máis afectados pola crise derivada da pandemia da Covid-19, “unha situación que está lonxe de revertirse e á que agora tamén se suman os efectos da crise enerxética”. Fronte a isto, indicou a concelleira, “ábrese un espazo de oportunidade grazas aos fondos europeos Next Generation, con convocatorias que pretenden xerar novas actividades e procesos culturais para favorecer a creación de emprego”. Novoneyra referiuse, en concreto, ao proxecto “Cultura Emerxente”, “que ten a particularidade de estar orientado á mulleres e persoas menores de 40 anos, e que atende a cuestións como a inclusión, a igualdade ou a sustentabilidade nas industrias culturais e creativas”.
A concelleira de Compostela Aberta sinalou que “a participación nestas convocatorias presenta certa complexidade, e entendemos que o Concello debe ter un papel activo para que os potenciais beneficiarios reciban a axuda que garanta o seu acceso ás axudas europeas”
Axudas municipais
Ademais, Branca Novoneyra insta ao Goberno local “a planificar a convocatoria das axudas municipais para entidades culturais, tanto para profesionais como para asociacións, de xeito que sexan compatibles cos fondos europeos, e tamén de maneira que non se repitan os erros de 2021”. A concelleira lembrou que o ano pasado “só tres entidades asociativas foron beneficiarias das subvencións para actividades culturais, de xeito que se perderon case 40.000 euros dos 48.500 orzados para a connvocatoria; e tamén foron moitas as empresas que desistiron da solicitude por unha cuestión de prazos”. Tal e como denunciara Compostela Aberta, as axudas quedaron resoltas o 19 de outubro, e o prazo para xustificalas rematou só dez días despois, o 29 de outubro, “un prazo inasumible, porque moitas empresas non quixeron desenvolver a actividade sen ter asegurada a subvención municipal”.
No próximo Pleno, Compostela Aberta defenderá unha moción na que insta ao Goberno local a programar unha formación intensiva dirixida por unha banda a empresas e pola outra a mulleres, persoas menores de 40 anos, membros de asociacións culturais e outras persoas vinculadas co sector da cultura, interesadas en captar financiamento dos fondos europeos Next Generation. Ademais, CA reclama que a convocatoria das axudas das actividades culturais deste ano “sexan compatibles coas subvencións para o sector cultural galego vinculadas á próxima implantación dos fontos Next Generation”.
