- O concelleiro de CA lembra que en novembro a concelleira Mila Castro afirmou que se estaban realizando as obrigadas inspeccións, pero o Comité de Empresa segue denunciando numerosos incumprimentos que lle afectan á calidade do servizo
Compostela Aberta pedirálle ao Goberno que dea conta no próximo Pleno das inspeccións e controis de calidade do servizo de recollida do lixo que se veñen desenvolvendo desde a entrada en vigor do novo contrato, e das sancións impostas por posibles incidencias. O concelleiro Xan Duro lembrou que “CA xa pediu esta información por escrito o pasado 14 de decembro, o prazo establecido polo regulamento municipal para responder é dun mes, pero pasados máis de dous meses seguimos sen acceder a eses datos, nunha práctica á que lamentablemente xa nos tén afeitos aos grupos da oposición”. O edil preguntouse “que tén que esconder e a quen quere protexer o Goberno”, e lembrou que o comité de empresa de Urbaser segue denunciando o mal funcionamento do servizo.
As deficiencias na prestación do servizo de recollida do lixo e limpeza viaria veñen sendo obxecto de denuncia por parte do Comité de Empresa de Urbaser desde a entrada en vigor do novo contrato, e continúan vixentes transcorridos dez meses. No Pleno de novembro, os tres grupos da oposición presentaron unha moción conxunta, recollendo os incumprimentos relatados polos traballadores e instando ao Goberno a realizar un maior control do servizo. Na súa resposta, a concelleira de Medio Ambiente afirmou que xa estaba contratada unha empresa encargada do control de calidade do servizo, tal e como se establecía no prego da licitación do contrato. O 14 de decembro, Compostela Aberta rexistrou unha serie de preguntas ao respecto deste control de calidade, pero a día de hoxe o Goberno segue sen respondelas, e por ese motivo Xan Duro interpelará ao Goberno de maneira oral no Pleno do próximo día 28.
Tal e como explica Xan Duro, o prego para a contratación dos servizos de recollida do lixo e limpeza viaria recolle a obriga da concesionaria de contratar unha empresa independente para realizar ese traballo de control e inspección, seguindo parámetros tanto cuantitativos como cualitativos. Ademais, o prego sinaloa que o obxectivo deste control é presentar melloras nos puntos que presenten anomalías reincidentes, comprobar os medios que se están a empregar no servizo, e definir as penalizacións nas que puidera incorrer a empresa adxudicataria do servizo. Tendo en conta as reiteradas queixas do comité de empresa de Urbaser, o concelleiro de Compostela Aberta pídelle ao Goberno que transparente que empresa está desenvolvendo o traballo de inspección e control de calidade, cantos controis fixo, en que datas e que incidencias foron detectadas; e cantas sancións foron impostas en virtude destes controis.
