A monarquía como sistema de goberno nunha sociedade democrática é cuestionable, unha posición que cada vez ten máis apoios na nosa sociedade. Neste sentido, as organizacións municipalistas Compostela Aberta, Guanyen Badalona en Comú, MÉS-Estimam Palma e Zaragoza en Común impulsan unha campaña conxunta para facer unha chamada a cidadanía e que mostre a súa repulsa cara a monarquía, diante das últimas informacións sobre as sociedades offshore das que sería beneficiario Felipe VI. As formacións municipalistas entenden que “o anuncio da renuncia á súa herdanza por parte do Rei é o recoñecemento da corrupción que existiu durante anos na Casa Real”.
Nas redes, a partir do domingo
Compostela Aberta, Guanyen Badalona en Comú, MÉS-Estimam Palma e Zaragoza en Común convocan á cidadanía a compartir nas súas redes sociais unha fotografía cun cartel no que se poida ler o lema #ByeByeBorbones, acompañada polo mesmo hashtag. A campaña para visibilizar o rexeitamento á Monarquía arrancará o domingo, 22 de marzo, a partir das 19 horas.
Unha campaña aberta a outras formacións municipalistas ou republicanas, e a toda a cidadanía en xeral, que ten como obxectivo animar á veciñanza a reclamar a abdicación de Felipe VI. As catro formacións municipalistas queren reivindicar un proceso constituínte para que a cidadanía poida elixir entre Monarquía e República. Nesa liña, lembran que “son xa demasiados episodios escuros ao redor da Casa Real española e, en particular do rei emérito Juan Carlos de Borbón, que tén amasada unha inmensa fortuna nas últimas décadas desde a impunidade que lle ofrecía o seu cargo”.
