O grupo municipal de Compostela Aberta vén de preguntarlle ao Goberno polo prazo que manexa para iniciar a licitación das novas illas de compostaxe comunitaria nos barrios, como as que xa funcionan en Galeras, Santa Marta e Salgueiriños. O proxecto fora presentado durante o pasado mandato a unha convocatoria de subvencións do Ministerio de Transición Ecolóxica, que comprometeu a achega de case 50.000 euros.
Compostela Aberta rexistrou unha pregunta para que o Goberno informe dos pasos que ten dado para iniciar a licitación do proxecto, tendo en conta que os pregos quedaron elaborados no pasado mandato. Segundo os prazos fixados polo Ministerio de Transición Ecolóxica, a ampliación das illas de compostaxe comunitaria debera estar executada en abril de 2020. Do contrario, podería perderse a subvención de 46.371 euros que lle foi concedida ao Concello de Santiago no marco da convocatoria PIMA, en concreto na liña de actuación Residuos-Compost coa que o Ministerio pretendía fomentar a recollida separada de biorresiduos, a compostaxe doméstica e comunitaria, e a construción de instalacións de compostaxe de biorresiduos para o seu tratamento.
Aposta clara pola compostaxe
O proxecto presentado polo Goberno de Compostela Aberta á convocatoria do Ministerio de Transición Ecolóxica permitiría a instalación de novas illas de compostaxe como as que veñen funcionando nos barrios de Galeras, Santa Marta e Salgueiriños e que utilizan máis dun cento de veciños e veciñas. Ademais, durante o pasado mandato instaláronse composteiros en sete centros de Educación Infantil e Primaria e iniciouse un programa de compostaxe doméstica nas parroquias de Figueiras, Grixoa, Laraño, Villestro, A Gracia e Sabugueira.
Deste xeito, empezouse a darlle cumprimento aos obxectivos fixados pola ‘Rede Estatal de entidades locais pola compostaxe doméstica e comunitaria’, da que Santiago forma parte por acordo do Pleno do Concello -co voto favorable das forzas progresistas da corporación- celebrado en novembro de 2016.
PODES CONSULTAR AQUÍ A PREGUNTA FORMULADA POLO GRUPO MUNICIPAL DE CA
