• Xan Duro lembra que os equipos deportivos seguen sen cobrar as subvencións de 2021, “achegas fundamentais para que poidan afrontar os seus gastos ordinarios”

O concelleiro de Compostela Aberta Xan Duro cualificou hoxe de “impresentable que o Concello siga sen abonar as subvencións nominativas para os clubs deportivos da cidade correspondentes ao ano pasado, un atraso que está poñendo nunha situación dramática a moitos equipos da cidade”. O edil explicou que un dos clubs afectados é o Santiago Futsal, “que empeza a pensar na súa liquidación por unha situación económica moi complexa, na que a axuda municipal é fundamental para afrontar algúns dos seus pagos pendentes”.

Xan Duro lembrou que os clubs da cidade “levan meses denunciando a situación que atravesan e os prexuízos que lles está ocasionando o atraso no cobro das subvencións comprometidas para o ano pasado, unhas queixas que o Goberno está demostrando que non lle preocupan”. O concelleiro de Compostela Aberta volveu reclamarlle á concelleira de Deportes “que dea a cara diante dos clubs e que non siga poñendo escusas para xustificar o inxustificable”.

Solidariedade co Santiago Futsal

Duro lembrou que “a subvención municipal é fundamental nas economías precarias dos clubs deportivos, que precisan esas achegas para afrontar cuestións como o pago das inscricións nas súas competicións”. O edil referiuse, en concreto, ao caso do Santiago Futsal “que empeza a pensar na súa liquidación froito dunha delicada situación económica que arrastra no tempo, e para o que a subvención do Concello sería un importante respiro, que lle permitiría abonar algún gasto como o do pago dos árbitros”. 

A subvención nominativa do Santiago Futsal en 2021 era de 65.000 euros, e para este ano 2022 ten aprobada outra achega municipal de 54.000 euros, “que tampouco saben cando van poder cobrar”. Para Xan Duro, “a concelleira Esther Pedrosa debería reflexionar sobre cales están sendo as consecuencias da súa pasividade e da súa incompetencia, porque en moitos equipos de Compostela poden ser consecuencias irrevertibles”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies