CA, BNG e PSdeG-PSOE asinan un acordo orzamentario que pon por riba de todo os intereses da veciñanza de Santiago de Compostela

Goretti Sanmartín, María Rozas e Aitor Bouza coinciden en cualificar o orzamento municipal como social, igualitario e deseñado para o mantemento dos barrios e das parroquias

María Rozas, en representación de CA, Goretti Sanmartín, en representación do BNG, e Aitor Bouza, en representación do PSdeG-PSOE, veñen de asinar o acordo para os orzamentos municipais de 2024 que, en palabras da alcaldesa “responde ás necesidades dun orzamento feito e pensado para as persoas, un orzamento social, igualitario, e deseñado para o mantemento de barrios e de parroquias”.

Goretti Sanmartín afirmou que “este acordo que vimos de subscribir é froito do diálogo, da colaboración e da vontade de poñer por riba de calquera outra cuestión as necesidades da veciñanza de Santiago de Compostela”. A alcaldesa explicou que “despois de estarmos cuns orzamentos prorrogados xa desde o ano 2022, é preciso acadar estabilidade orzamentaria e poder ter unha folla de ruta para seguir durante o ano 2024”. Neste sentido, lembrou que “como goberno tiñamos un obxectivo claro que era chegar a finais de ano cunha proposta orzamentaria que fora viable e realista, e con este acordo que hoxe asinamos entendemos que este reto está cumprido”.

A portavoz de Compostela Aberta tamén mostrou a súa satisfacción “porque as tres forzas progresistas demostramos a nosa capacidade para chegar a acordos polo interese dos veciños e veciñas de Santiago”. María Rozas incidiu en que “en democracia é importante buscar puntos comúns e incorporar a mirada dos outros, e iso fixemos no Goberno incluíndo na proposta de orzamentos cuestións que sabiamos que eran de interese común co PSOE, ao que lle agradecemos a súa vontade de manter un diálogo construtivo e de non dilatar os tempos”.

Ademais, Rozas salientou que as tres forzas progresistas “demostramos un especial interese por termos uns orzamentos claramente sociais, que atenden cuestións prioritarias como o incremento das partidas destinadas ao Servizo de Axuda no Fogar, a conciliación, o compromiso co rural, ou a mellora dos servizos públicos”.

Pola súa banda, o representante do PSdeG-PSOE asegurou que “hoxe é un bo día para Compostela porque por fin temos un instrumento para facer realidade as demandas sociais”. Aitor Bouza afirmou que “a oposición ten que servir para o que serve a política: construír, debater, chegar a puntos de encontro e facilitar a vida das persoas”. Os orzamentos municipais, que ascenden a 141.184.052,95 euros, continuarán nas vindeiras semanas o correspondente procedemento de tramitación administrativa para ser finalmente aprobado en acordo plenario.

Documentación
relacionada
ACORDO ENTRE O BLOQUE NACIONALISTA GALEGO, COMPOSTELA ABERTA E O PSdeG-PSOE PARA OS ORZAMENTOS MUNICIPAIS DE 2024
Novas
relacionadas

O Pleno de Santiago debaterá unha moción conxunta de CA e BNG para rexeitar o proxecto de Altri

Os dous grupos do Goberno solicítanlle á Xunta que emita un informe negativo a ese proxecto industrial contaminante pola súa afectación ambiental, patrimonial e económica

Compostela Aberta chama a participar o domingo na Manifestación en Defensa do Mar

A manifestación partirá ás 12.00 horas da Alameda de Santiago para denunciar o desleixo da Xunta e reclamar transparencia na información sobre a vertedura dos pellets

CA esixe responsabilidade á Xunta diante do desastre dos pellets e solidarízase cos municipios afectados

Compostela Aberta denuncia a incompetencia da administración autonómica, que reaccionou tarde e mal, e parabeniza á sociedade civil que está a organizarse para a recollida desta vertedura, así como ao movemento ecoloxista e asociacións en defensa das rías.

Moción conxunta para reclamarlle á Xunta que cumpra con Santiago e resolva o caos de tráfico e de falta de aparcadoiro no CHUS

María Rozas, Gonzalo Muíños e Míriam Louzao presentan unha iniciativa para que a Xunta asuma a súa competencia e realice o investimento necesario

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo