- Da lista forman parte os e as exconcelleiras de Compostela Aberta “porque despois dun mandato de incapacidade e falta de proxecto reivindicamos con máis forza o traballo feito polo Goberno de Compostela Aberta”
A candidata de Compostela Aberta á alcaldía presentou hoxe o segundo tramo da lista coa que concorre ás eleccións municipais de maio, “unha candidatura que bebe do feminismo, do activismo social e cultural e do movemento sindical, que representa á totalidade do termo municipal, e que reivindica o traballo feito polo Goberno de Martiño Noriega”. O exalcalde é o encargado de pechar a lista, no posto 25, por detrás da presidenta do comité de empresa de Zara na provincia da Coruña, Carmiña Naveiro; e da escritora e académica Marilar Aleixandre, que hoxe participaron tamén na rolda de prensa de presentación.
María Rozas deu a coñecer hoxe a totalidade da lista electoral coa que se presenta ás eleccións municipais do 28 de maio, unha lista formada por 15 mulleres e 10 homes; aos que hai que engadir as 6 mulleres e 4 homes que figuran como suplentes. A candidata de CA salientou que “encabezo unha candidatura cun 60 por cento de mulleres, unha porcentaxe que non responde a ningunha cota senón á realidade dunha forza feminista como é Compostela Aberta”. Do mesmo xeito, a portavoz municipal incidiu en que esta é unha lista “cunha alta representación do movemento sindical, con persoas como Carminha que encabezou as protestas contra Inditex que acabaron cunha importante mellora salarial para as traballadoras; Carlos Pardo, que foi secretario xeral da unión intercomarcal de Comisións Obreiras Santiago-Barbanza; ou Soledad García Rio, do comité de empresa do Servizo de Axuda no Fogar”. O activismo social e cultural, con nomes como o de Marilar Aleixandre ou Eli Cabeza Romero, a implantación territorial da lista, “con integrantes que proceden de todas zonas de Santiago, desde Marrozos a Salgueiriños, pasando polo Ensanche, a zona histórica, Vista Alegre, a Almáciga ou Fontiñas”; e o coñecemento dos servizos municipais “son outros dos valores desta candidatura”.
Reivindicar o traballo feito
María Rozas recoñeceu que “a lista tamén é un exercicio de recoñecemento para todos os concelleiros e concelleiras que fixeron parte do Goberno de Martiño Noriega, empezando polo propio exalcalde”. A candidata de CA sinalou que “para min, o feito de que Martiño Noriega peche a lista e que no último tramo tamén aparezan Noa Morales, Rafa Peña, Concha Fernández ou Manolo Dios é unha maneira de reivindicar e de poñer en valor o traballo feito polo Goberno de Compostela Aberta, fronte a un mandato de parálise, de falta de ideas e de incapacidade para xestionar do equipo de Bugallo”.
María Rozas rematou agradecéndolle a todas as persoas da candidatura “que teñan dado un paso á fronte para participar na lista de Compostela Aberta, unha lista que reflexa o enorme capital político e humano da nosa organización”. A candidatura completa vaise presentar o próximo martes na Sala Capitol, nun acto aberto á veciñanza a partir das 20.00 horas.
