- Marta Lois e Jorge Duarte reuníronse cos representantes das asociacións de comerciantes do Ensanche, partidarias de manter a configuración do solar proposta no pasado mandato
Compostela Aberta reclámalle ao Goberno de Bugallo que o aparcamento que se acondicione na parcela do antigo colexio Peleteiro sexa público e de xestión directa a través de Tussa. Así o explicou o concelleiro Jorge Duarte, que lamentou que a aposta do alcalde “sexa un novo estacionamento en réxime de concesión, similar aos que xa existen no Ensanche, e non un modelo como o do aparcadoiro de Xoán XXIII, que permitiría que o Concello fixara os seus prezos libremente”. O edil tamén reiterou a aposta de CA porque se manteña a configuración das edificacións do solar prevista en 2019 “que contaba co consenso das entidades veciñais e comerciais”.
A portavoz municipal de CA, Marta Lois, e o concelleiro Jorge Duarte mantiveron onte unha xuntanza cos representantes das entidades comerciais Santiago Centro, Comercio Punto Compostela e Em Rede, para coñecer o seu posicionamento ao respecto dos plans que o Goberno lle trasladou á oposición o pasado venres na Comisión Especial de Peleteiro. Un dos asuntos abordados na xuntanza foi o relativo ao estacionamento, “porque tanto Compostela Aberta como as asociacións de comerciantes entenden que o Ensanche precisa un aparcamento público de xestión directa, no que se poidan fixar prezos asumibles”. Jorge Duarte incidiu en que o Goberno debe apostar “pola xestión a través de Tussa, seguindo o modelo do estacionamento de Xoán XXIII”.
Praza pública
Na reunión, Marta Lois e Jorge Duarte tamén recolleron as demandas das entidades comerciais en relación á praza pública que ocupará o patio do antigo colexio. As asociacións reiteraron a súa aposta porque se manteña a configuración prevista en 2019, cunha praza aberta cara a República Arxentina e non cara San Pedro de Mezonzo como propón agora o PSOE. Jorge Duarte lembrou que no documento de avaliación ambiental que o Concello lle remitiu á Xunta no ano 2018 contemplábanse diferentes solucións para o desenvolvemento do ámbito, e entre elas estaba a que agora defende o Goberno de Bugallo, “pero que non acadou o consenso necesario entre veciñanza e comerciantes durante o período de exposición pública”. O edil explicou que “este foi o motivo polo que o Goberno de CA optou por manter a actual configuración dos volumes edificados, coa abertura da praza cara República Arxentina”.
Jorge Duarte explicou que na reunión mantida onte, “os e as representantes das entidades comerciais tamén manifestaron a súa sorpresa porque, dous anos despois, o Goberno manteña o reparto de usos da parcela de Peleteiro que o PSOE tumbara no Pleno en 2019”. O concelleiro insistiu en que “é incomprensible que se perdera todo este tempo, e que Bugallo non reunira á Comisión de Peleteiro desde hai nove meses malia a que desde decembro de 2019 tiña no seu poder un informe no que o Concello gastou 15.000 euros e que xa dicía que a proposta de CA para o solar era a mellor das posibles”.
