A portavoz municipal de Compostela Aberta denunciou hoxe que o Goberno local “tén esquecidos os compromisos que adquiriu coas traballadoras do Servizo de Axuda no Fogar”, tanto no relativo á actualización dos seus salarios como no que ten que ver con medidas para facilitar os seus desprazamentos laborais. Marta Lois preguntará no próximo Pleno os motivos destes incumprimentos e urxirá á concelleira Mila Castro a cumprir as súas palabra co persoal do SAF.
Marta Lois lembrou que “Compostela Aberta vén trasladando as queixas das traballadoras do Servizo de Axuda no Fogar ao Pleno nos últimos anos, porque entendemos que un persoal que presta un servizo tan esencial para colectivos vulnerables como o das persoas maiores ou dependentes non pode estar sometido a ningún tipo de precarización”. A concelleira incidiu en que a concelleira de Políticas Sociais, Mila Castro, “non se reuniu coas traballadoras do SAF ata despois de que CA denunciara a súa situación, e cando o fixo asumiu uns compromisos que seguen sen cumprirse”.
Unha das cuestións que o Goberno se comprometeu a atender ten que ver cos desprazamentos laborais das traballadoras do SAF, que pediron ter acceso á tarxetas de residente para poder estacionar os seus vehículos cerca dos domicilios nos que prestan os eus servizos. Tal e como aseguran, “Mila Castro comprometeuse a que esa medida fora efectiva coa entrada en vigor do novo contrato do Servizo de Axuda no Fogar, pero a día de hoxe aínda nada se sabe ao respecto”.
A maiores, Marta Lois denunciou que ás traballadoras do SAF non se lles aplicou a suba salarial do IPC de 2021, “ainda cando nos pregos técnicos para a contratación do servizo se fai referencia a esta actualización”. A portavoz municipal de Compostela Aberta lamentou que “o último convenio colectivo do Servizo de Axuda no Fogar asinouse en 2009, e a patronal do sector négase a negociar un novo acordo sen que as diferentes administracións implicadas fagan nada para garantir o cumprimento dos dereitos das traballadoras”. No caso de Santiago, sinalou Lois, “o Concello debe urxir á empresa adxudicataria, a multinacional DomusVi, a efectivizar esta actualización dos salarios do persoal”.