Compostela Aberta insta ao Goberno local a ofrecer acollemento ás persoas refuxiadas do campamento de Moria, na illa grega de Lesbos, ante a situación de emerxencia que se vive na zona tras o incendio provocado hai unha semana. O grupo municipal de CA lembra que Santiago ténse adherido á Rede de Cidades Refuxio, a través dunha declaración institucional aprobada polo Pleno da Corporación, e é hora de mostrar que esa adhesión non é unicamente simbólica nin unha mera declaración de intencións.
Compostela Aberta mostra a súa solidariedade coas persoas refuxiadas de Moria, que xa vivían nunha situación inhumana nun campamento pensado para 3.000 persoas e utilizado por unhas 13.000, e que agora se enfrontan a unha auténtica traxedia por mor do incendio que devastou a zona. As persoas refuxiadas seguen a día de hoxe vagando pola illa de Lesbos, montando campamentos improvisados en lugares como os aparcamentos de supermercados, e sen que atopar das autoridades gregas nin das europeas máis resposta que o reforzo da vixilancia policial.
O grupo municipal de CA reclama ao Concello de Santiago que mostre o seu compromiso real coas persoas refuxiadas, facendo valer as declaracións institucionais que foron aprobadas polo Pleno durante o pasado mandato. En concreto, a Corporación acordou por unanimidade a adhesión de Santiago á Rede de Cidades de Refuxio, así como a colaboración coa Rede Galega de Apoio ás Persoas Refuxiadas. En virtude deses acordos, Compostela debe facilitar o empadroamento ás persoas refuxiadas que cheguen ao municipio, e promover a súa integración real e efectiva. O Concello de Santiago dispón, ademais, dunha ferramenta acaída para lograr esa integración, a Ordenanza de Garantía Básica Cidadá á que pode acceder calquera persoa que estea empadronada en Compostela.
