CA insta ao Pleno a defender os dereitos sexuais e reprodutivos das mulleres e a rexeitar protocolos antiabortistas

Marta Lois advirte que “o acontecido en Castela e León semella non ser un caso illado senón responder a un intento de retroceder nas conquistas dos dereitos das mulleres co que o presidente da Xunta se tén mostrado comprensivo”

Compostela Aberta levará ao Pleno de mañá unha moción de urxencia para que a Corporación municipal de Santiago se posicione en defensa dos dereitos sexuais e reprodutivos das mulleres e da reforma do Lei do Aborto, e mostre a súa repulsa coas actitudes do Goberno de Castela e León, que tén anunciado medidas para boicotear esa normativa. A concelleira Marta Lois lembrou que “a saúde e os dereitos sexuais e reprodutivos das mulleres son dereitos humanos que urxe garantir fronte ás múltiples tentativas e propostas para retroceder nestas conquistas, atentar contra os dereitos das mulleres e, ao tempo, erosionar a democracia”.

A moción rexistrada por Compostela Aberta insta á Corporación municipal a apoiar a reforma da Lei do Aborto aprobada no pasado mes de decembro no Congreso, e ao Goberno local a organizar campañas informativas que expliquen as novidades e os avances desa reforma. Ademais, a moción demándalle ao Goberno galego que garanta o exercicio efectivo de todos os dereitos sexuais e reprodutivos das mulleres no Servizo Galego de Saúde; e ao Goberno do Estado a implementar as medidas necesarias, mesmo xudiciais, para evitar a existencia de calquera protocolo antiabortista, como o que vén anunciando o Goberno de Castela e León.

Marta Lois explicou que “o acontecido en Castela e León semella non ser un caso anecdótico nin isolado, senón que podería responder a unha estratexia máis ampla para boicotear a reforma da Lei do Aborto, e non só desde a extrema dereita”. Para a concelleira de Compostela Aberta, “urxe posicionarse con contundencia fronte a  calquera anuncio de trabas contra a nova lei ou contra a insinuación de posibles barreiras para a súa aplicación nos sistemas públicos de saúde, porque iso significa retroceder nas conquistas dos dereitos das mulleres e da propia democracia”. Nesa liña, Lois referiuse  ao protocolo antiabortista anunciado polo Goberno de Castela e León, formado por Partido Popular e Vox, e salientou que “é moi preocupante que a primeira reacción do presidente da Xunta ao ser preguntado por esta cuestión fora a defensa das medidas impulsadas pola extrema dereita, das que só tomou distancia cando comprobou a alarma social que se tiña producido”. A concelleira de CA recoñeceu que “non sorprende demasiado a actitude de Alfonso Rueda, porque hai que lembrar que a Xunta de Feijóo xa impulsara diferentes iniciativas lexislativas moi regresivas contra os dereitos sexuais e reprodutivos das mulleres, en colaboración coa  Red Madre, unha rede antiabortista que tén recibido ata 300.000 euros de subvencións públicas do Goberno autonómico”. Tamén lembrou que “ainda que a  Xunta  sostén que os abortos se practican con normalidade nos hospitais galegos, a realidade é que as mulleres que queren interrumpir o seu embarazo se atopan con frecuentes trabas, e esmo o SERGAS tén sido condenado pola xustiza pola demora na práctica dun aborto terapéutico a unha paciente que finalmente tivo que desprazarse a Madrid para ser sometida a esa intervención”.

Documentación
relacionada
MOCIÓN DE URXENCIA DO GRUPO MUNICIPAL DE COMPOSTELA ABERTA EN DEFENSA DOS DEREITOS SEXUAIS E REPRODUTIVOS DAS MULLERES E POLA REFORMA DA LEI DO ABORTO
Novas
relacionadas

O Pleno de Santiago debaterá unha moción conxunta de CA e BNG para rexeitar o proxecto de Altri

Os dous grupos do Goberno solicítanlle á Xunta que emita un informe negativo a ese proxecto industrial contaminante pola súa afectación ambiental, patrimonial e económica

CA, BNG e PSdeG-PSOE asinan un acordo orzamentario que pon por riba de todo os intereses da veciñanza de Santiago de Compostela

Goretti Sanmartín, María Rozas e Aitor Bouza coinciden en cualificar o orzamento municipal como social, igualitario e deseñado para o mantemento dos barrios e das parroquias

Moción conxunta para reclamarlle á Xunta que cumpra con Santiago e resolva o caos de tráfico e de falta de aparcadoiro no CHUS

María Rozas, Gonzalo Muíños e Míriam Louzao presentan unha iniciativa para que a Xunta asuma a súa competencia e realice o investimento necesario

“Nos primeiros cen días de Goberno atendimos urxencias como a dos autobuses, recuperamos o diálogo social, e reconducimos o proxecto do Centro de Persoas sen Fogar” 

O Goberno mantivo un encontro cos medios de comunicación para facer balace dos cen primeiros días de mandato

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo