• Compostela Aberta entende que “o fomento da mobilidade intelixente sostible  non debera colisionar con algúns dereitos fundamentais da cidadanía como o da intimidade ou a libre circulación de persoas”

Compostela Aberta pídelle ao Goberno local “que reavalíe a instalación das máis de 40 cámaras que tén previsto colocar na zona histórica, no marco do proxecto Smartiago”. O grupo municipal de CA advirte que a posta en marcha deses dispositivos “pode colisionar con dereitos fundamentais da cidadanía como son o da privacidade e intimidade, o da libre circulación das persoas ou mesmo o da liberdade de expresión”.

O concelleiro Xan Duro destacou que, con este tipo de propostas, o goberno de Bugallo está a desvirtuar o proxecto Smartiago, impulsado polo Goberno de Compostela Aberta e polo que no anterior mandato o Concello captou máis de cinco millóns de euros de fondos europeos. O edil de CA sinalou que a liña de actuación na que se enmarca a anunciada instalación de 43 cámaras, a da mobilidade intelixente sostible, “debería afondar no cumprimento das normas de acceso e estacionamento da cidade histórica, garantir a introdución do novo vehículo eléctrico adecuado para o recinto intramuros, e desenvolver a tecnoloxía que permitira controlar o acceso e o estacionamento, substituíndo as cámaras e os bolardos tradicionais”. Duro cuestionou que, co Goberno do PSOE, “a solución para a liña da mobilidade intelixente volva pasar polas cámaras”, e recordoulle a Bugallo que “nas súas anteriores etapas como alcalde xa foi o responsable da instalación de sistemas de videovixilancia que tiveron unha forte contestación social”.

Compostela Aberta demándalle ao Goberno que reavalíe a pertinencia de instalar as 43 cámaras anunciadas, nas que se van investir 1,4 millóns de euros, e que procure outras solucións innovadoras, que non choquen con dereitos fundamentais da veciñanza. O grupo municipal de CA entende que “a gravación de todos os movementos da cidanía pode colisionar cos dereito á privacidade e á intimidade, á libre circulación de persoas, ou mesmo o dereito de expresión”.

PODES CONSULTAR AQUÍ O ROGO DO GRUPO MUNICIPAL DE COMPOSTELA ABERTA PARA QUE SE IMPLEMENTEN SOLUCIÓNS INNOVADORAS PARA O FOMENTO DA MOBILIDADE INTELIXENTE E REAVALIAR A INSTALACIÓN DAS 43 CÁMARAS PREVISTAS

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies