• O concelleiro Xan Duro lembra que a adxudicataria do PMUS tén a obriga de presentar un Plan Director de Mobilidade Ciclista
  • A concellería de Mobilidade destina 200.000 euros de fondos europeos á redacción do PMUS, e a concellería de Centros Socioculturais e Obras gasta case 18.000 euros no seu estudo sobre mobilidade ciclista

Compostela Aberta vén de rexistrar unha pregunta para que o Goberno local explique os motivos da contratación dun estudo sobre a mobilidade ciclista en Santiago, cando xa se atopa en licitación a redacción do Plan de Mobilidade Urbana Sostible que, nun dos seus apartados, debe avaliar o sistema de mobilidade en bicicleta na cidade. Para o concelleiro Xan Duro, “resulta chamativo que a concellería de Centros Socioculturais e Obras pague agora case 18.000 euros por un informe, mentres a concellería de Mobilidade está en pleno proceso de adxudicación do PMUS cun orzamento de 200.000 euros”. O edil pídelle ao Goberno que explique “que información adicional se pretende que achegue este estudo, e cales foron os informes técnicos que aconsellaron a súa contratación”

Na pregunta rexistrada hoxe, o grupo municipal de CA lembra que no pasado mes de maio a Xunta de Goberno aprobou a apertura do procedemento de adxudicación do proxecto de revisión do Plan de Mobilidade Urbana Sostible, a proposta da concellería de Mobilidade e Seguridade Cidadá. Estes traballos están cofinanciados con fondos europeos do programa EDUSI, e contan cun orzamento total de 200.000 euros. Tal e como se sinala nos pregos para a licitación, que foron publicados na Plataforma de Contratación do Sector Público o 8 de xuño, un dos apartados a avaliar dentro do PMUS é o Sistema de mobilidade de bicicleta. En concreto, os pregos sinalan que no proceso de revisión do Plan de Mobilidade Urbana Sostible realizarase o inventario da rede ciclista do municipio; definirase un sistema para a implantación xeralizada da bicicleta como modo de transporte co obxectivo de comunicar calquera punto da cidade entre sí dentro dos parámetros axeitados de seguridade e comodidade ciclista; e avaliarase o espazo viario, urbano e territorial e conceptuaráse xerarquicamente en función do nivel de compatibilidade ou coexistencia dos espazos destinados á bicicleta; entre outras cuestións. Nos pregos para a redacción do PMUS sinálase que “Todos os datos, as análises e as diagnoses, a planificación estratéxica, as propostas e os programas de medidas medidas relativas ao sistema de mobilidade ciclista se integrarán nun documento específico denominado Plan Director de Mobilidade Ciclista e todo tipo de VMP, que se entregará como subproduto da asistencia técnica”.

Co proceso de licitación do PMUS en marcha, o pasado 28 de setembro a concellería delegada de Centros Socioculturais, Barrios e Obras aprobou un decreto “para a contratación da redacción dun estudo base para a definición do estado actual do uso da bicicleta en Santiago de Compostela e da capacidade de acollida de desprazamentos ciclistas da rede viaria existente”. O contrato menor foi adxudicado por un importe de 17.545 euros. A maiores, o pasado 26 de outubro, a páxina web do periódico El Correo Gallego publicou un formulario sobre mobilidade, vinculándoo a que “a concellería de Centros Socioculturais, Barrios, Obras e Relacións Veciñais vén de encargar a unha empresa especializada un estudo para incorporar mobilidades brandas, criterios de sostibilidade e redución da pegada de carbono en todas as súas actuacións futuras na cidade”.

Para o concelleiro Xan Duro, o Goberno debe explicar “con que obxectivos concretos a concellería de Centros Socioculturais e Obras contrata este estudo e seguindo que informes técnicos, tendo en conta que a concellería de Mobilidade está a licitar o PMUS; e tén que aclarar que orzamento exacto se está a destinar a este informe”.

Duplicidade de informes

Non é a primeira vez que o grupo municipal de Compostela Aberta advirte que o Goberno local encarga varios informes sobre a mesma temática, tirando de contratos menores. Así, no primeiro trimestre do ano, o Goberno de Bugallo destinou 90.000 euros á contratación de cinco estudos relacionados co sector turístico, aínda cando o Concello tén aprobado un Plan Estratéxico do Turismo de Santiago para o periodo 2017-2022 ao que Incolsa destinou algo máis de 30.000 euros. A esa lista vén de engadirse, no pasado mes de agosto, outro informe que custou máis de 17.000 euros, baixo o nome de “Estudo de mercado sobre o posicionamento de Santiago de Compostela nos mercados turísticos obxectivo tras a crise da Covid-19”.

PODES CONSULTAR AQUÍ A PREGUNTA DE COMPOSTELA ABERTA SOBRE OS ESTUDOS SOBRE A MOBILIDADE CICLISTA EN COMPOSTELA

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies