• Branca Novoneyra denuncia que a concellería de Turismo “comprometeuse a desenvolver o proxecto e meses despois derivouno á concellería de Medio Rural”
  • Compostela Aberta pregunta no Pleno polo destino dos fondos das axudas ao sector da cultural que queden sen gastar “por desestimento das empresas beneficiarias ou porque só tres asociacións obtiveron a subvención”

Branca Novoneyra preguntará no Pleno de mañá pola paralización do proxecto da ruta cultural entre Barciela e Marantes, “un proxecto que inicialmente asumiu a concellería de Turismo, que posteriormente foi derivado á de Medio Rural, e do que nunca máis se soubo”. A concelleira de Compostela Aberta lamentou “o escaso interese do Goberno por unha iniciativa que contribuiría a poñer en valor o patrimonio rural de Santiago e podería servir de reclamo para a descentralización turística”.

Branca Novoneyra lembrou que en xaneiro deste ano, o concelleiro de Turismo Sindo Guinarte comprometeuse coa Asociación de Veciños de Marantes a desenvolver a ruta cultural entre esta parroquia e Barciela, “e mesmo asegurou que o proxecto tería en encaixe no Plan de Sostibilidade Turística 2021-2023, que está dotado cun total de tres millóns de euros dos que un millón se prevía executar neste ano”. Só cinco meses despois de asumir ese compromiso, explicou a concelleira de CA, Guinarte decidiu derivar o proxecto da ruta cultural á concellería do Medio Rural “sen mediar explicación ningunha e sen falar novamente coa veciñanza”. Recollendo a preocupación da AVV de Marantes, Novoneyra preguntará no Pleno “cales foron os motivos polos que a concellería de Turismo se desentendeu deste proxecto, e en que fase se atopa para o seu desenvolvemento, cando quedon só dous meses para que remte o ano”.

Axudas culturais

Branca Novoneyra tamén leva ao Pleno de mañá unha pregunta sobre as axudas a entidades profesionais e asociacións do sector cultural, tras coñecerse a resolución definitiva da convocatoria o pasado 13 de outubro, “só once días antes do remate do prazo para o desenvolvemento das actividades subvencionables, e só 16 días antes de que as entidades beneficiarias tiveran que xustificar as axudas”. A concelleira sinalou que “son moitas as entidades que desistiron de recibir as subvencións, porque non puideron desenvolver os seus proxectos sen ter a garantía de contar con esa axuda, nun contexto tan complexo como o actual derivado da pandemia e cuns prazos que o Goberno non quixo mudar a pesar de que llo pedimos desde Compostela Aberta”. Por ese motivo, Novoneyra pedialle á concelleira de Cultura que explique no Pleno “cal será o destino dos fondos que ían ir destinados a esas entidades profesionais que finalmente desistiron dos apoios, e do diñeiro que quedou sen gastar na convocatoria de axudas a asociacións culturais, na que só houbo tres colectivos beneficiarios”.

PODES CONSULTAR AQUÍ A PREGUNTA DO GRUPO MUNICIPAL DE COMPOSTELA ABERTA SOBRE A NECESIDADE DE IMPLANTAR A SINALÉCTICA DA RUTA CULTURAL BARCIELA-MARANTES

PODES CONSULTAR AQUÍ A PREGUNTA DO GRUPO MUNICIPAL DE COMPOSTELA ABERTA SOBRE AXUDAS CULTURAIS ÁS ACTIVIDADES DO SECTOR PROFESIONAL

 

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies