CA pide melloras urxentes no aparcamento do Agro da Colexiata

Xan Duro lamenta que o Goberno “non dera nin un paso para desenvolver o anteproxecto que herdou de CA para acondicionar a zona deportiva das Brañas de Sar, que sería a solución definitiva aos problemas de estacionamento no barrio”

Compostela Aberta pedirá no Pleno o pintado e a dotación de equipamentos deportivos para o espazo multiusos do Castiñeiriño “que a veciñanza vén reclamando desde hai máis dun ano”

Santiago de Compostela, 26 de novembro de 2022.- Compostela Aberta lamentou hoxe que Bugallo “deixara pasar todo o mandato sen procurar unha solución definitiva para os problemas de aparcamento en Sar, cando recibiu do anterior Goberno un anteproxecto para o acondicionamento da zona deportiva das Brañas que tamén prevía un espazo de estacionamento para a veciñanza do barrio”. O concelleiro Xan Duro denunciou que “o resultado da improvisación do Concello é unha área de aparcamento intransitable e mesmo insegura, na que o Goberno local debe acometer melloras de maneira urxente”.

Xan Duro lembrou que, despois das queixas polo caos de estacionamento na contorna da Colexiata, o Goberno decidiu acometer unha solución provisional abrindo un aparcamento no agro da Colexiata. O grupo municipal de Compostela Aberta vén recibindo numerosas queixas polo estado no que se atopa esta área, “convertida nunha lameira, con fochancas tan profundas que os coches rozan os baixos para acceder, e tan insegura que mesmo teñen aparecido coches aos que lles roubaron as rodas”. O concelleiro de CA reclamará no Pleno “que o Goberno acometa algunha actuación de emerxencia neste punto, porque de non adoptarse medidas en breve este estacionamento será totalmente inutilizable”.

O edil sinalou tamén que “a solución buscada por Bugallo para o aparcamento en Sar non deixa de ser un remendo, que non satisfai as demandas da veciñanza que reclama unha solución definitiva e máis ambiciosa”. Nesa liña, Xan Duro lembrou que o Goberno “perdeu todo o mandato sen avanzar na creación da zona deportiva das Brañas do Sar, prevista no PXOM e da que recibiu feito un anteproxecto do Goberno de Compostela Aberta que contemplaba o acondicionamiento dunha área de aparcamento”. “CA reclamou en Pleno en dúas ocasións neste mandato que se desenvolvera esta actuación, en 2020 e neste 2022, pero o Goberno foi incapaz de avanzar nesta actuación”.

Campo multiusos do Castiñeiriño

No Pleno da próxima semana, Compostela Aberta tamén interpelará ao Goberno sobre os prazos que manexa para instalar os equipamentos pendentes no campo multiusos do Castiñeiriño, “que foi deseñado como un espazo polivalente no que se puideran acondicionar cando menos dúas pistas polideportivas”. Xan Duro lembrou que xa no Pleno de novembro de 2021, CA pediulle ao Goberno que completara o proxecto porque era unha demanda da veciñanza, “e daquela o entón concelleiro de Obras respondera que o Goberno atendería as peticións, estudaríaas e faría o oportuno, pero a realidade é que transcorrido un ano nada se fixo neste espazo que fica infrautilizado”

Xan Duro recordou que O Castiñeiriño é un barrio no que está aumentando de xeito importante a poboación, “e está infradotado de instalacións deportivas, posto que só existen unha pequena pista no Centro Sociocultural e o patio do vello colexio Ramón Cabanillas, que tén os equipamentos deportivos nun lamentable estado de abandono”. O concelleiro de CA lamentou que o Goberno “non sexa quen nin de atender unha demanda tan sinxela como é o pintado das pistas deportivas e a instalación dos equipamentos que mudarían sensiblemente a utilidade do espazo, acondicionado seguindo tamén un proxecto de Compostela Aberta”.

Novas
relacionadas

María Rozas denuncia “a falta de impulso político e de capacidade de xestión da concellería de Deportes” nun encontro con entidades deportivas de Santiago

A candidata de Compostela Aberta considera que “remata un mandato en branco, sen avances nas novas infraestructuras deportivas nin en mantemento, e con continuos problemas na tramitación das subvencións municipais”

María Rozas no COAG: “Precisamos unha administración máis eficiente  e un Goberno máis dialogante para resolver os retos de Santiago”

A portavoz municipal mantén unha xuntanza cunha representación do Colexio Oficial de Arquitectos para presentar as propostas de Compostela Aberta en materia de mobilidade, mellora dos espazos públicos ou vivenda “despois dun mandato perdido para a veciñanza”

María Rozas: “É pouco crible que Bugallo anuncie plans de investimentos para Lavacolla mentres non realiza nin o mantemento dos viarios da parroquia”

A portavoz de Compostela Aberta e o concelleiro Xan Duro visitaron Lavacolla para recoller as demandas da veciñanza

María Rozas: “Se quere pechar o caso Pichel, Bugallo perdeu onte unha gran oportunidade de dar explicacións e despexar dúbidas no Pleno”

A portavoz de Compostela Aberta lamenta que o Goberno non respondera a ningunha das preguntas que leva formulando máis de dez días

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo