- Compostela Aberta reitera que apoiará a alternativa que xere consenso, e pide traballar nunha vía alternativa que logre ese acordo
A portavoz municipal de Compostela Aberta, Marta Lois, e o concelleiro Jorge Duarte reclamáronlle hoxe ao alcalde que retome o diálogo co conxunto da veciñanza do Ensanche “para atopar unha solución para Peleteiro que xere o consenso que precisa unha operación deste calado e pola que Santiago leva dúas décadas agardando”. Foi despois de teren participado na asamblea informativa organizada pola Plataforma de Afectadas pola parcela de Peleteiro, á que foron convidados os catro grupos da Corporación municipal e na que só rexeitou intervir o PSOE. Para Lois e Duarte, “non hai mellor exemplo do pouco interese que ten Bugallo en transparentar e contrapoñer as diferentes opcións que se seguen barallando para a parcela do antigo colexio”.
Na xuntanza celebrada onte, salientou Marta Lois, “quedou en evidencia o descontento da veciñanza ante a falta de diálogo co Goberno, que non está a explicar con claridade os motivos polos que defende unha opción para Peleteiro que segue sen gozar de consenso”. Para a portavoz municipal de Compostela Aberta, “recuperar o acordo que había en 2019 é fundamental por principios democráticos, pero tamén por seguridade xurídica, tendo en conta ademais que a veciñanza do ámbito de Peleteiro,e máis en concreto da rúa da Rosa, xa ten recurrido anteriormente, e con éxito, aos tribunais”
Buscar unha nova vía
O concelleiro Jorge Duarte insistiu en que “despois de todo o traballo que se leva feito nos últimos anos, o Goberno non pode renunciar a conseguir o consenso do tecido comercial e veciñal do Ensanche, porque ese consenso xa existía en 2019”. Para o edil, “os residentes demostraron na reunión de onte que queren ser oídos, e os tres grupos políticos que asistimos á xuntanza demostramos que estamos dispostos a escoitalos e a procurar novas vías para darlle a mellor solución á operación Peleteiro”. Agora, incidiu, “tócalle a Bugalo explicar por que é o único que prefire non dar explicacións nunha asamblea veciñal coma a de onte”.
Duarte lembrou que CA “xa adiantou que non se oporá a ningunha solución consensuada para Peleteiro, pero onte quedounos claro que esa solución ainda non existe”. Por iso, o concelleiro ofreceu a colaboración de Compostela Aberta “para traballar nunha nova vía que sexa integradora e que garanta o acordo, unha vía que mesmo podería pasar por incrementar a dotación pública da parcela a través dun investimento municipal”.
