• Compostela Aberta denuncia que o Goberno de Feijóo mantén o aforo nos autobuses ao 100% “só para non ter que gastar no reforzo do servizo, e mentres impón serias restricións a sectores como a hostalería”

Compostela Aberta pediulle hoxe ao Goberno local que manteña limitacións de aforo nos autobuses urbanos e reforce as liñas que teñan unha maior ocupación, malia a decisión da Xunta de permitir a ocupación do 100% dos asentos no transporte de viaxeiros que é da súa competencia. Para o grupo municipal de CA, “o Goberno de Feijóo volve demostrar que a súa prioridade non é a saúde pública, e que as únicas medidas que está disposto a adoptar nesta pandemia son as que non lle custan cartos porque só se basean no sacrificio da cidadanía”.

Compostela Aberta insta ao Goberno a manter a redución do aforo no transporte público ao 50%, e a reforzar as liñas máis utilizadas, e nos horarios con maior demanda. Para o grupo municipal de CA, “o Concello de Santiago non pode facer seguidismo da Xunta nunha decisión tan irresponsable como a que vén den recoller na nova orde publicada no Diario Oficial de Galicia”, que permite a ocupación da totalidade dos asentos dos autobuses e só establece limitacións para as prazas de pé, ao tempo que aconsella que os viaxeiros e viaxeiras manteñan entre elas a máxima distancia posible.

Compostela Aberta entende que a Xunta “volve adoptar unha decisión que se basea en criterios económicos e políticos máis que de saúde pública, porque o único que pretende o Goberno de Feijóo é aforrar os custos e os trámites que suporía ter que reforzar os servizos de transporte que son da súa competencia”. O grupo municipal lamenta que a Xunta “actúe nesta crise únicamente impoñendo restricións á cidadanía e pedindo medidas a outras administracións”. Nesa liña, CA lembra que “é incomprensible que o Goberno de Feijóo veña de decretar o peche da hostalería baixo o argumento dos riscos de contaxio, e cunhas compensacións económicas para o sector claramente insuficientes, ao tempo que permite que continúe a masificación no transporte público por non querer ou por non ser quen de establecer alternativas con garantías para a poboación”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies