• Compostela Aberta lamenta que a concelleira de Benestar Animal considere que esa é a mellor opción diante dos gastos de persoal do Refuxio de Bando

A concelleira de Compostela Aberta Branca Novoneyra mostrou hoxe a súa preocupación despois de que na última reunión extraordinaria da Fundación Refuxio de Animais a edila responsable de Benestar Animal comunicara que valora a posibilidade de privatizar o servizo ao entender que os gastos de persoal da entidade son insostibles. CA levará ao próximo Pleno un rogo para instar ao Goberno a rexeitar esa opción e para coñecer que xestións se están a realizar para garantir a sostibilidade do servizo.

Branca Novoneyra explicou que na última reunión do Padroado da Fundación Refuxio de Animais, celebrada o pasado 16 de xullo, a concelleira Esther Pedrosa afirmou que o Goberno está a valorar a posibilidade de disolver esta fundación e privatizar o servizo, ao considerar que é insostible afrontar os seus gastos de persoal. A concelleira de Compostela Aberta, que xa mostrou a súa discrepancia con esa opción na propia xuntanza, reclámalle ao Goberno que informe das xestións que tén abertas para posibilitar a sostibilidade do Refuxio. Nesa liña, Novoneyra pide coñecer que xestións ou que medidas se están a adoptar para incrementar os ingresos do Refuxio, que é pioneiro na atención ao Benestar en Galicia, e se se tén elaborado algún plan de financiamento coa colaboración de todos os concellos que forman parte da Fundación. Para a concelleira de CA, é preocupante que a única alternativa que formule a edila responsable de Benestar Animal sexa a privatización do Refuxio, “sen ter en conta como lle podería afectar esa externalización á calidade do servizo ou á situación laboral dos traballadores e traballadoras da Fundación”.

A Fundación Refuxio de Animais está participada, ademais de por  Santiago, polos concellos de Vedra, Teo, Val do Dubra, Touro, Boqueixón, Trazo e Dodro. Estes dous últimos municipios incorporáronse á entidade na reunión extraordinaria da semana pasada, na que a concelleira desvelou os seus lans para a disolución da entidade. O Refuxio de Bando é unha instalación modélica en Galicia, e é o único que pode ser considerado como un auténtico centro de protección animal.

PODES CONSULTAR AQUÍ O ROGO DE CA PARA EVITAR A DISOLUCIÓN DA FUNDACIÓN REFUXIO DE ANIMAIS E A PRIVATIZACIÓN DO  SERVIZO

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies