A portavoz municipal de Compostela Aberta pediulle hoxe ao Goberno que cumpra os seus compromisos coa veciñanza do Viso, e que aclare como e cando se vai acometer o investimento de 150.000 euros anunciado polo alcalde para evitar os asolagamentos na rúa do Ameneiral. María Rozas visitou o barrio, acompañada por representantes veciñais, que seguen sen noticias sobre as obras comprometidas por Bugallo.
A comezos de marzo, o alcalde e a concelleira de Medio Ambiente visitaron o Viso, e alí explicaron que o Concello estaba avanzando nun proxecto “que suporía un investimento estimado de máis de 150.000 euros para o encauzamento das augas pluviais procedentes da AP-9 e do Monte Gaiás”. A portavoz de CA pediulle ao Goberno que “despois dese anuncio, explique cal é a tramitación que se fixo sobre esta actuación, porque a realidade é que o Concello non tén orzamentos en vigor cos que poder acometer a obra, e nada se informou á veciñanza sobre os contactos que se ían manter coas administracións central e autonómica para buscar outras fontes de financiamento”. Para María Rozas, “todo apunta a que este foi un anuncio electoralista máis de Bugallo, porque parece evidente que eta actuación non vai quedar sequera encamiñada neste mandato”.
Durante a súa visita ao barrio, na que estivo acompañada por André Seoane, María Rozas tamén coñeceu a preocupación polo estado dun muro de contención que está afectado polo paso de vehículos pesados, “e que foi valado polo Concello, pero que se descoñece se se van adoptar outras medidas e cando”. Ademais, a veciñanza explicou outras demandas do barrio, como o asfaltado dunha pista no Viso de Arriba para mellorar as conexións da aldea, o arranxo das varandas da ponte sobre o río, ou a necesidade de mellorar o alumeado na aldea.
