O concelleiro de Compostela Aberta Jorge Duarte pediulle hoxe ao Goberno local “que reactive o control das terrazas, para garantir que se cumpra a ordenanza que regula a ocupación do espazo público”. O edil explicou que nas últimas semanas estanse a producir moitas queixas de veciños e veciñas que atoparon dificultades, non só para transitar polas rúas e prazas, senón mesmo para accederen ás súas vivendas. Para Duarte, “unha vez que se levantaron todas as limitacións da pandemia para a ocupación no interior dos establecementos, urxe recuperar tamén a normalidade no que tén que ver co uso que fan do exterior”.
Jorge Duarte lembrou que na pandemia Compostela Aberta mostrouse favorable a flexibilizar a ocupación do espazo público por parte dos locais de hostalería, co obxectivo de facilitar o mantemento dos negocios e dos postos de traballo nun dos sectores máis damnificados polas restricións derivadas da Covid. Agora, sinalou o concelleiro, xa non hai limitacións para a ocupación do interior dos locais, “e polo tanto non está xustificado que as terrazas sigan estando sobredimensionadas”. Duarte explicou que nas últimas semanas, “a alta presión turística que sufriu a zona histórica traduciuse tamén no descontrol das terrazas, especialmente en puntos sensibles como Carretas ou a Troia, nos que os veciños e veciñas atoparon dificultades mesmo para acceder aos portais das súas vivendas pola presenza de mesas e cadeiras que non respectaban a ordenanza en vigor”.
O edil de CA preguntará no próximo Pleno pola situación das terrazas e polo incumprimento da ordenanza municipal de terrazas, “que foi aprobada durante o pasado mandato co obxectivo de conciliar as demandas dos establecementos co dereito da veciñanza a desfrutar e circular con liberdade polo espazo público”.
PODES CONSULTAR AQUÍ A PREGUNTA ORAL DO GRUPO MUNICIPAL DE COMPOSTELA ABERTA SOBRE O CONTROL DA OCUPACIÓN DO ESPAZO PÚBLICO POR PARTE DAS TERRAZAS DE HOSTELERÍA
