• Xan Duro lembra que “as altas temperaturas dos últimos días requiren a máxima precaucación para que non se repita o acontecido en 2020”

Compostela Aberta urxiu hoxe ao Goberno local “a poñer en marcha todas as medidas preventivas e a prever o maior reforzo de medios que sexa posible para evitar incidentes nos Fogos do Apóstolo diante da situación de seca e de temperaturas extremas que está a vivir Santiago”. O concelleiro Xan Duro mostrou a súa preocupación “porque o espectáculo pirotécnico volve incluír puntos de lanzamento que teñen riscos do punto de vista da posibilidade de que se rexistren incendios, como o que xa vivimos no ano 2020”.

O espectáculo pirotécnico da noite do 24 de xullo prevé cinco puntos de lanzamento: a Alameda, a Cidade da Cultura, As Cancelas, o parque de Carlomagno e o parque de Eugenio Granell. Xan Duro sinalou que se trata de “localizacións que nalgún caso poden resultar conflitivas, e máis na situación meteorolóxica que atravesamos, con moitas xornadas seguidas con temperaturas extremas”. O concelleiro de CA reclamou que “se impulsen todas as medidas que sexan posibles para evitar situacións como a que vivimos en 2020, cando os Fogos do Apóstolo orixinaron un incendio na zonado Monte do Seixo, e para actuar coa maior premura no caso de que esas situacións se repitan”. 

Duro pediulle ao Goberno que actúe “con premura e con previsión, ao contrario do que fixo en 2020 cando a Delegación do Goberno comunicou numerosas deficiencias no Plan de Seguridade e no Plan de Emerxencia, con cuestións que non foron resoltas ata as horas previas ao espectáculo”. Ademais, reclamou que se adopten outras medidas “como a roza das fincas próximas aos puntos de lanzamento, tendo en conta que o propio alcalde atribuiu á falta de limpeza dos terreos o incendio orixinado en 2020”.  O edil de CA lembrou, por último, que a Consellería de Medio Rural vén de remitir circulares aos concellos galegos para lembrarlles a prohibición do uso de fogos de artificio e pirotecnia en terreos forestais ou de influencia forestal nas áreas nas que o índice de risco de incendios sexa extremo, tal e como sinala a Lei de prevención e defensa contra os incendios forestais de Galicia. Segundo esa normativa, o Concello non poderá autorizar a utilización de artefactos que leven aparellado o uso de fogo, fogos de artificio, globos e artefactos pirotécnicos; e no caso de que ó índice de risco diario de incendio forestal sexa extremo o día da celebración, entenderánse revogadas as autorizacións emitidas con anterioridade”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies