- María Rozas lembra que “os dous servizos son prestados sen contrato, mentres que o persoal leva anos reivindicando melloras laborais que deberan ser contempladas nos novos pregos”
Compostela Aberta pídelle ao Goberno que explique cando ten previsto iniciar a licitación dos contratos de conserxería e limpeza dos CEIPS e de varias instalacións deportivas de competencia municipal, e que medidas vai adoptar para garantir quese cumpran as reivindicacións e as demandas do persoal que atende estes servizos. María Rozas denunciou o atraso que acumulan eses procedementos “que aparecían no Plan de Contratación de 2020, polos que preguntamos hai un ano no Pleno, e sobre os que o Goberno de Bugallo non parece ter feito nada nos tres anos que levamos de mandato”.
En xullo de 2021, Compostela Aberta xa preguntara no Pleno polas previsións do Goberno sobre tres contratos de conserxería e limpeza: o das instalacións dependentes do Concello, o dos CEIPs, e o de varias instalacións deportivas. Transcorrido un ano, o Goberno só foi quen de licitar o primeiro deles e os outros dous servizos estánse prestando en precario. No caso dos CEIPs, é Ferrovial Servicios quen se segue ocupando da conserxería e limpeza, e nada se sabe da nova licitación, que xa aparecía contemplada no Plan de Contratación de 2020. En canto ás instalacións deportivas, o servizo funciona unha orde de continuidade desde maio de 2021, despois de que a empresa Lacera renunciara a un segundo ano de prórroga do contrato.
Tal e como explica María Rozas, “o atraso na licitación destes contratos preocupa especialmente porque falamos de servizos nos que o persoal leva anos trasladando reivindicacións sobre as súas condicións laborais que en certa medida deben ser atendidas nos novos pregos”. Así, no caso da limpeza e conserxería dos CEIPS, os traballadres e trabaadoras veñen reclamando que se homoxeneicen as categorías profesionais para garantir que a postos similares existan as mesmas condicións. En canto ao serivzo de conserxería e limpeza das instalacións deportivas, “a situación é máis grave, porque xa existe un conflito xudicial sobre a interpretación do convenio colectivo no que tén que ver coa actualización dos salarios, que entendemos que o Concello debe ter en conta, a favor do persoal, nos novos pregos”. A maiores, este persoal reclama “unha ampliación das melloras sociais, e unha reorganización do traballo que favoreza as contratacións por xornada completa”.
PODES LER AQUÍ A PREGUNTA ORAL DO GRUPO MUNICIPAL DE COMPOSTELA ABERTA SOBRE OS SERVIZOS DE CONSERXARÍAS E LIMPEZA DOS CENTROS EDUCATIVOS E DAS INSTALACIÓNS DEPORTIVAS QUE ACTUALMENTE SEN CONTRATO
