Compostela Aberta acordou, nunha asemblea extraordinaria, dar o seu apoio e implicarse nunha candidatura de unidade popular para as próximas eleccións galegas do 5 de abril, que sexa representativa do conxunto do espazo e na que se garantan vías para a participación da organización nese proceso electoral. No caso de que esa candidatura de unidade non sexa viable, celebrarase unha segunda sesión da asemblea para decidir a posición de CA.
Nun documento aprobado hoxe por unanimidade, Compostela Aberta lembra que “ainda sendo un proxecto político municipalista, sempre fomos conscientes de que as políticas transformadoras non se poden aplicar só desde o local, e coerentemente con isto, témonos implicado na construción de alternativas de ámbito nacional”. Nesa liña, lembra que “nos últimos cinco anos, CA ten exercido como o referente local da acción politico-institucional desenvolvida polo espazo da esquerda rupturista, tanto no Parlamento galego como nas Cortes do Estado”.
Momento crucial
Compostela Aberta lembra que as próximas eleccións galegas “chegan nun momento crucial para definir o campo da acción política do futuro próximo”, e incide en que “necesitamos un novo goberno galego que se aproveite da nosa experiencia de goberno, que ten demostrado que a nosa é unha alternativa real e viable para defender o ben común e impulsar políticas transformadoras, despois de derrotar ao Partido Popular e cesar as súas políticas depredadoras”. No documento aprobado por unanimidade, CA insiste en que “neste contexto, e no marco natural para reforzar o suxeito político galego, é imprescindible pór a nosa experiencia municipalista e de goberno ao servizo do conxunto da cidadanía galega e poder iniciar un camiño de transformación e mudanza política no noso país”.
PODES CONSULTAR AQUÍ O DOCUMENTO APROBADO NA ASEMBLEA EXTRAORDINARIA DE CA
