Compostela Aberta reclamará no próximo Pleno que o Gobierno encargue a redacción do I Plan Estratéxico da Cultura de Santiago, “para realizar unha planificación do sector, preservando numerosos proxectos históricos e abrindo o campo a novas iniciativas para que garantan o dereito ao acceso e á participación da cidadanía na cultura”. Explicouno Branca Novoneyra, que denunciou que “Compostela non deixa de perder posicións nos barómetros das políticas culturais das principais cidades do Estado”.
A concelleira de Compostela Aberta referiuse ao informe “Lo mejor de la cultura 2022”, publicado a semana pasada pola Fundación Contemporánea e que está considerado un barómetro de referencia a nivel estatal. Para Novoneyra “é moi preocupante que Santiago siga perdendo postos nese informe sobre a calidade e a innovación da oferta cultural, pasando do 10 que acadamos en 2016 ao posto 15 no que se atopa a capital galega no ranking de 2022, que coñeciamos a semana pasada”. En termos porcentuais, apuntou, “a baixada é de catro puntos de media neste mandato con respecto ao anterior”. Ademais, a concelleira salientou que “Santiago non resiste a comparativa con outra cidade galega como A Coruña, que pasou de estar detrás de Compostela en canto á calidade da oferta cultural no ano 2016, a situarse cinco postos por diante”. Así, no informe de 2016, Santiago situábase no décimo posto do ranking de cidades do Estado en canto á calidade da súa oferta cultural e A Coruña atopábase no décimoquinto; xusto ao contrario do que acontece no ranking de 2022”.
Plan Estratéxico da Cultura
Branca Novoneyra incidiu en que “diante desta involución, é necesario que o Concello adopte medidas e fixe as prioridades da política cultural municipal a medio prazo, que sirvan de base a decisións estables alén dos ciclos electorais”. Nesa liña, a concelleira apostou por encargar a redacción dun Plan Estratéxico da Cultura Municipal “que naza dunha avaliación consensuada por axentes sociais e culturais, que reflicta a diversidade das miradas desde os ámbitos público, privado e asociativo; que comparta un mapa cultural da cidade e oriente as políticas públicas no ámbito da cultura, cun horizonte dun mínimo e cinco anos”.
A concelleira de Compostela Aberta apuntou ao exemplo de Ferrol, “pìoneira na posta en marcha dun Plan Estratéxico da Cultura, co obxectivo de imprimir orde e racionalidade na acción cultural municipal, integrar na maior medida posible a pluralidade de voces, perspectivas, intereses e sensibilidades da sociedade no que atinxe ao eido cultural; e dotar de continuidade á acción cultural municipal”. Para Novoneyra, “estes debe ser tamén o horizonte co que traballe o Concello de Santiago, e por iso sería desexable que o actual Goberno deixara xa encargada a elaboración dese Plan Estratéxico”. Novoneyra incidiu en que “non se poden adoptar decijsións sen datos, e a realidade é que imos rematar o mandato sen que sequera se actualice o informe Municipal da Cultura”.
