• Xan Duro sostén que non hai motivos para manter as restricións de acceso impostas durante a pandemia

Compostela Aberta pedirá no próximo Pleno que o Concello de Santiago volva permitir o acceso de atletas non federados ao estadio municipal Verónica Boquete de San Lázaro para realizaren os seus adestramentos. O concelleiro Xan Duro lamentou que “no actual escenario de volta á normalidade en practicamente todos os ámbitos, os deportistas sigan atopando estas restricións para a utilización dunhas instalacións deportivas municipais”.

Durante a pandemia da Covid, o Concello de Santiago mudou as normas de acceso ás instalacións municipais, tamén as deportivas. As restricións afectáronlle ao público, pero tamén aos deportistas. No caso do estadio municipal Verónica Boquete de San Lázaro, acordouse permitir a utilización das pistas de atletismo tan só aos atletas federados. A día de hoxe, explicou Xan Duro, esta restrición segue vixente, cos prexuízos que iso supón para  numerosos deportistas de Santiago non federados, “nunha cidade na que é coñecida a carencia de instalacións acaídas para a práctica do atletismo”. O concelleiro de Compostela Aberta instou ao Goberno a “recuperar as normas de acceso ás instalacións previas á pandemia, para facilitar os seus adestramentos a todos os atletas de Santiago, estean ou non federados”.

 

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies