CA reclámalle a Bugallo que cumpra o compromiso de destinar 3,5 millóns de euros máis a axudas directas á hostalería e ao comercio

Os remanentes de 5 millóns de euros que o Goberno negociou coa oposición hai só dúas semanas, serán finalmente de non máis de 2,5 millóns de euros
  • Compostela Aberta reclamará que a totalidade dos remanentes dispoñibles sexan para axudas directas e que se aprobe un modificativo do orzamento de 2021 para chegar á cifra comprometida coas asociacións de comerciantes e hostaleiros
  • María Rozas urxe a Bugallo “a deixar de practicar o trilerismo financeiro co que quere ocultar a súa mala xestión e co que leva meses vendendo as mesmas axudas como se foran novas”

Compostela Aberta denunciou hoxe “a falta de seriedade e a improvisación do Goberno de Bugallo, que dúas semanas despois de que a Xunta de Voceiros chegara a un acordo sobre o reparto dos remanentes municipais de 2020 vén de informar de que a cantidade dispoñible será menos da metade da prevista”. A concelleira María Rozas urxiu ao Executivo a “cumprir a palabra que lle deu aos grupos da oposición pero tamén, e sobre todo, aos sectores máis damnificados pola crise da Covid, aos que lles prometeu novas convocatorias de axudas directas con 3,5 millóns de euros procedentes deses remanentes que agora non existen”.

A concelleira de Compostela Aberta María Rozas explicou que fronte aos 5 millóns de euros de remanentes que o Goberno vén anunciando desde o mes de febreiro, “onte dísenos que a cantidade dispoñible será dalgo menos de 2,5 millóns de euros, aínda que en CA cremos que esa cifra pode ser aínda menor porque hai datos que non nos cadran e pediremos que nolos aclaren”. Para Rozas, “é inconcebible que o alcalde negocie coa oposición e mesmo lle traslade ás asociacións de comerciantes e hostaleiros a dispoñibilidade duns recursos que finalmente non existen porque Bugallo dedicouse a facer as contas da leiteira”. A concelleira lembrou, ademais, que o alcalde intentou vincular a negociación dos orzamentos á negociación dos remanentes “e agora queda demostrado que CA tiña motivos para non entrar nese xogo, porque claramente o Goberno non cumpriría a súa palabra, como xa fixo en relación aos orzamentos de 2020”.

“Bugallo practica o trilerismo financeiro”

María Rozas esixiulle ao Goberno que procure as fórmulas necesarias para cumprir o compromiso que adquiriu coa oposición e cos sectores da hostalería e do comercio, e destine outros 3,5 millóns de euros a axudas directas. Para iso, indicou, “será preciso utilizar toda a cantidade dispoñible dos remanentes, pero tamén habilitar algún modificativo dos orzamentos do 2021 que veñen de ser aprobados inicialmente”. 

Para a concelleira de Compostela Aberta, “Bugallo tén que deixar de practicar o trilerismo financeiro ao que nos tén afeitas para ocultar a súa mala xestión, e polo que leva meses vendendo como se foran novas as mesmas axudas para os sectores máis damnificados pola crise da Covid-19”. A maiores, lembrou que “o alcalde comprometeuse a sacar unha nova convocatoria a finais de marzo se contaba coa colaboración da oposición para aprobar os remanentes, o acordo para o reparto chegou o 23 de marzo, e a 7 de abril non hai nada feito porque nin sequera saben cantos cartos poden destinar a esas axudas”.

Novas
relacionadas

CA, BNG e PSdeG-PSOE asinan un acordo orzamentario que pon por riba de todo os intereses da veciñanza de Santiago de Compostela

Goretti Sanmartín, María Rozas e Aitor Bouza coinciden en cualificar o orzamento municipal como social, igualitario e deseñado para o mantemento dos barrios e das parroquias

Moción conxunta para reclamarlle á Xunta que cumpra con Santiago e resolva o caos de tráfico e de falta de aparcadoiro no CHUS

María Rozas, Gonzalo Muíños e Míriam Louzao presentan unha iniciativa para que a Xunta asuma a súa competencia e realice o investimento necesario

“Nos primeiros cen días de Goberno atendimos urxencias como a dos autobuses, recuperamos o diálogo social, e reconducimos o proxecto do Centro de Persoas sen Fogar” 

O Goberno mantivo un encontro cos medios de comunicación para facer balace dos cen primeiros días de mandato

“Para CA, o responsable cos veciños era estar no goberno e aportar estabilidade”

Entrevista a María Rozas, concellería de Dereitos e Servizos Sociais e primeira tenente de alcaldesa

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo