- A concelleira de Compostela Aberta pídelle ao Goberno que utilice os anticipos de caixa fixa para abonar as prestacións de rescate social contempladas na Ordenanza Municipal de Garantía Básica Cidadá
Compostela Aberta levará ao Pleno da próxima semana unha proposición na que insta ao Goberno local a incluír nas bases de execución do orzamento de 2021 a posiblidade de utilizar o sistema do Anticipo de Caixa Fixa para o capítulo das transferencias correntes e para axilizar o pago das axudas sociais. A concelleira de CA María Rozas lamentou que, pese a poder empregala desde o pasado mes de abril, o Concello non fixo uso desta ferramenta “que elimina a burocracia previa ao cobro das axudas para as persoas que se atopan nunha situación vulnerable, un colectivo que lamentablemente medrou neste ano a consecuencia da pandemia da Covid-19”
A concelleira de Compostela Aberta explicou que os Anticipos de Caixa Fixa “son un procedemento que aparece regulado na Lei das Facendas Locais, e que tén como obxectivo axilizar o pago de gastos habituais no funcionamento normal do Concello e de escasa contía, que se produzan de maneira reiterada como lamentablemente acontece coas axudas sociais”. Trátase dunha “provisión de fondos de carácter extraorzamentaria que permite atender os gastos de maneira inmediata, e que posteriormente se computan no capítulo de gastos correntes e bens e servizos, e que se deben xustificar cunha periodicidade establecida”. María Rozas lembrou que en abril de 2020, durante a primeira vaga da pandemia da Covid-19, o Concello acordou modificar as bases de execución do orzamento dese ano para incluír as instrucións de establecemento e xestión dos Anticipos de Caixa Fixa. Sen embargo, no pasado mes de outubro, o Goberno recoñeceu na resposta a unha pregunta formulada por escrito polo grupo municipal de CA que non tiña feito uso aínda desa ferramenta.
Axilizar as axudas sociais
Aínda que na modificación das bases dos orzamentos acordada en abril facía referencia á utilización do sistema de Anticipos de Caixa Fixa para gastos no capítulo de bens correntes e servizos, o acordo sinalaba que “de forma excepcional e motivada poderíanse imputar outros gastos” entre os que, incidiu María Rozas, poderían incluírse as axudas sociais. Para a concelleira de CA, “é difícil de entender que nun momento de crise como o que vivimos o Concello non aproveitara a ferramenta dos Anticipos de Caixa Fixa para axilizar o pago de determinadas axudas sociais, e preferira optar, nos momentos máis complicados da pandemia, por entregar vales de compra para o supermercado”. A concelleira insistiu en que o Goberno “non quixo utilizar as prestacións de rescate social que xa estaban reguladas pola Ordenanza Municipal de Garantía Básica, e que podería abonar de xeito inmediato a través dos Anticipos de Caixa Fixa, como fixeron outros concellos como o de Ames durante o estado de alarma”.
Tendo en conta que as consecuencias da pandemia estánse a alongar, Compostela Aberta demanda agora que as bases de execución do orzamento do ano 2021 contemplen xa a posibilidade de utilizar o anticipo de caixa fixa para o capítulo IV de transferencias correntes, e pídelle ao Goberno que empregue esta ferramenta contable para axilizar o pagamento das axudas sociais.
PODES CONSULTAR AQUÍ A PROPOSICIÓN DO GRUPO MUNICIPAL DE COMPOSTELA ABERTA PARA A IMPLANTACIÓN DOS ANTICIPOS DE CAIXA FIXA NAS AXUDAS SOCIAIS E PARA AXILIZAR O SEU PAGAMENTO.
