- Jorge Duarte denuncia que o Concello non está a facilitar a limpeza das áreas dos petróglifos, que custeará a Deputación, nin facendo divulgación do patrimonio
O concelleiro de Compostela Aberta Jorge Duarte denunciou hoxe “a falta dun compromiso real do Goberno de Bugallo co proxecto do Parque Arqueolóxico Compostela Rupestre, que se avanza é polo empeño das outras administracións implicadas: os concellos da nosa contorna e a Deputación da Coruña”. O edil de CA lamentou que “o Concello de Santiago non sexa quen nin tan sequera de facilitar a limpeza e mantemento das áreas dos petróglifos, ainda cando é o organismo provincial quen asumiu o custo destes traballos”.
No próximo Pleno, Jorge Duarte preguntarálle ao Goberno “que medidas vai tomar, e cando, para avanzar na limpeza e mantemento do Parque Arqueolóxico Compostela Rupestre, e que actuacións concretas ten previstas para a preservación e divulgación desta riqueza patrimonial do noso municipio”. O concelleiro de Compostela Aberta denunciou que “ainda cando a Deputación da Coruña vai asumir os gastos da limpeza e mantemento das áreas dos petróglifos, o Goberno de Santiago non está sendo quen, nin sequera, de facilitar estes traballos resolvendo con dilixencia a tramitación das autorizacións pertinentes”, e incidiu na importancia de que “esa limpeza se poida facer de cara o verán no que se incrementa o risco de que o patrimonio arqueolóxico sufra danos por mor dos incendios”.
Sen avances en tres anos
Duarte lamentou que “nestes tres anos o Goberno de Bugallo demostrou unha verdadeira falta de interese no proxecto Compostela Rupestre, impulsado durante o pasado mandato coa sinatura dun convenio entre os concellos de Santiago, Ames, Brión, Teo e Val do Dubra, e a Deputación da Coruña”. Para o concelleiro, “boa mostra disto é que o Concello de Santiago non está a desenvolver actividades específicas de conservación e divulgación do patrimonio arqueolóxico, ao contrario do que acontece noutros municipios próximos como Ames e Teo”.
Para o concelleiro de CA, “é fundamental que o Concello de Santiago se implique para que o Parque Arquelóxico Compostela Rupestre cumpra os obxectivos cos que naceu en 2018 para a promoción conxunta e posta en valor da arte rupestre na nosa comarca”.
PODES CONSULTAR AQUÍ A PREGUNTA ORAL DO GRUPO MUNICIPAL DE COMPOSTELA ABERTA SOBRE O PARQUE ARQUEOLÓXICO COMPOSTELA RUPESTRE
