Compostela Aberta reiterou o seu apoio á creación dun Conservatorio Profesional de Danza, na xuntanza que María Rozas e Branca Novoneyra mantiveron con Berta Secall e Lupe Carballo, representantes da Plataforma que vén demandando a creación deste centro. Está previsto que no próximo Pleno se aprobe unha declaración institucional para reclamar o conservatorio, “para o que é evidente que existe demanda, e para o que o Concello está en disposición de ceder un solar axeitado para a súa construción”.
Branca Novoneyra incidiu en que “Santiago precisa avanzar na implantación das ensinanzas artísticas, e o Conservatorio Profesional de Danza é un primeiro paso cara un obxectivo de futuro que debera ser a creación dun Ciclo Superior de Danza en Compostela, que sería o primeiro da nosa comunidade”. A concelleira de Compostela Aberta lembrou que “Lugo e A Coruña contan cun conservatorio profesional de danza que na capital galega non temos, e iso obriga a grandes desprazamentos ás persoas que queiran cursar os seus estudos nos centros oficiais adscritos á Consellería de Educación”. Nesa liña, Novoneyra explicou que “son centos as alumnas e alumnos inscritos nas escolas privadas de danza que están activas na cidade, e a demanda non para de medrar”.
Compostela Aberta leva anos apoiando as demandas da Plataforma para o Conservatorio de Danza de Santiago, “que vén facendo un enorme traballo para reclamar este centro, reflexado nos centos de sinaturas de apoio que teñen recollidas”. Para CA, “é tamén moi boa noticia que o Pleno da Corporación vaia aprobar por unanimidade esta declaración institucional, ao contrario do que aconteceu en novembro de 2019, cando o PP se abstivo na votación dunha proposta para reclamar que o Concello xestionara coa Xunta a implantación do Conservatorio Profesional de Danza de Santiago”.
