Este 3 de xuño celébrase o Día Mundial da Bicicleta e, no marco desta efeméride, Compostela Aberta demandoulle ao Goberno local que poña en marcha accións concretas destinadas a impulsar a mobilidade ciclista. O grupo municipal lembra que, tal e como se recolle no Pacto Local pola Mobilidade aprobado no pasado mandato, “a bicicleta debe ser, despois dos desprazamentos a pé, o piar dunha mobilidade urbana sustentable”. Nesa liña, CA urxe tamén á Deputación da Coruña a licitar as obras de acondicionamento da Vía Verde entre Santiago e Cerceda.
Compostela Aberta lembra que ao longo do pasado mandato impulsáronse varias medidas para pacificar o tráfico e, deste xeito, favorecer o uso da bicicleta. Así, acometéronse a peonalización da rúa de San Pedro e a peonalización branda de Xoán XXIII; pintáronse as plataformas avanzadas de espera para ciclistas e sinalizouse a preferencia ciclista no Ensanche; e instaláronse aparcabicicletas en toda a cidade. Ademais, aprobouse o Pacto Local pola Mobilidade, que agora deberá desenvolver o Plan de Mobilidade Urbana Sostible.
Vía Verde e sendas ciclables
Compostela Aberta insta ao Goberno Local a desenvolver outros proxectos que quedaron perfilados no pasado mandato. Entre eles, o grupo municipal lembra a senda peonil e ciclable de Cornes, para o que xa hai un proxecto orzado nalgo menos de 190.000 euros, que o PSOE eliminou dos orzamentos municipais de 2020. Ademais, CA pide que se retomen os proxectos para comunicar Milladoiro con Santiago e a Sionlla coa nova estación intermodal mediante unha senda ciclista para facilitar a combinación de medios de transporte.
Ademais, o grupo municipal de Compostela Aberta urxe á Deputación a licitar as obras da Vía Verde entre Santiago e Cerceda, para a que xa está o proxecto redactado desde o pasado mes de febreiro. CA lembra que, durante o pasado mandato, recuperouse o proxecto, ampliouse ata o concello de Cerceda, logrouse a implicación e o apoio da Fundación dos Ferrocarriles Españoles, e incorporouse á Deputación da Coruña para que asumira a redacción do proxecto e a licitación das obras. O acondicionamento do trazado, de 36,5 quilómetros, suporá un investimento de 2,4 millóns de euros, dos que 1,8 millóns procederán de fondos europeos FEDER, dunha convocatoria para fomentar a mobilidade sostible e a economía baixa en carbono.
