O concelleiro de Compostela Aberta Jorge Duarte urxiu hoxe ao Goberno local a abrir un proceso de diálogo co comité de empresa de Tussa, que vén mostrando a súa preocupación pola falta de noticias ao respecto do seu inminente traslado da actual estación de autobuses, onde a empresa municipal tén localizada a súa sede. O edil lembrou que a Xunta tén anunciado o peche do edificio de San Caetano nun prazo de dous meses pola apertura da nova terminal, e “nada se sabe da planificación do Concello ao respecto dos traballadores e traballadoras de Tussa”. Ademais, Duarte reclámalle ao Goberno “que empece a traballar no novo convenio colectivo do persoal da empresa municipal de transportes, que xa estaba avanzado en maio de 2019, e que o equipo de Bugallo parece ter esquecido”.
Jorge Duarte deu conta hoxe da moción que o grupo municipal de Compostela Aberta levará ao Pleno do próximo xoves, para reclamar que se establezan os necesarios mecanismos de diálogo co comité de empresa de Tussa e coa representación sindical dos traballadores e traballadoras. Ademais, CA pide que a Corporación inste á Xunta de Galicia a garantir o acondicionamento de espazos de traballo correctamente habilitados para o persoal da empresa municipal de transportes cando rematen as obras da nova estación de autobuses. Duarte explicou que “o Goberno non mantén ningún tipo de interlocución cos traballadores e traballadoras de Tussa, malia que o comité de empresa así o vén solicitando desde o pasado mes de xuño”. O concelleiro lamentou que “a falta de diálogo sexa permanentemente a estratexia do equipo de Bugallo, tanto coas empresas municipais como co persoal das concesionarias que se encargan de importantes servizos públicos municipais”.
Demandas pendentes
O concelleiro de CA sinalou que os traballadores e traballadoras de Tussa teñen varios temas pendentes de resolver por parte do Goberno, dos que non reciben ningún tipo de retorno. Un deles, apuntou Duarte, é o seu inminente traslado, “do que nada saben, malia a terse interesado en varias ocasións por este asunto, a última delas en febreiro”. O persoal explica que descoñece como están a ser habilitados os novos locais de traballo, para os que terán que trasladarse nun prazo de tan só dous meses.
Ademais, Duarte explicou que “o Goberno de Bugallo tén abandonada a negociación do novo convenio colectivo, que Compostela Aberta xa deixara moi avanzada en maio de 2019, despois da municipalización da ORA e do guindastre e para responder á incorporación dos seus traballadores, e o persoal segue tamén sen cobrar a suba salarial de 2020”. Ademais, lamentou que “nin o alcalde nin o concelleiro responsable desta área, Gonzalo Muíños, teñan informado da restruturación do servizo de guindastre e das quendas de traballo; nin sobre outras cuestións como a avaliación dos riscos psicosociais no servizo de guindastre”.
Para Jorge Duarte, “o Goberno do PSOE está a vulnerar os dereitos dos traballadores e traballadoras, que se senten desprotexidos pola administración municipal”. Unha vez máis, concluiu o concelleiro, “Bugallo demostra cal é o seu talante, e evidencia que o diálogo non vai con el”.
PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA QUE SE ESTABLEZAN OS PERTINENTES MECANISMOS DE DIÁLOGO COAS E COS TRABALLADORES DA EMPRESA MUNICIPAL TUSSA E A SÚA REPRESENTACIÓN SINDICAL