Compostela Aberta, BNG e PP veñen de manter unha xuntanza co Comité de Empresa de Urbaser, que leva semanas denunciando incumprimentos por parte da concesionaria do servizo de recollida do lixo e que xa celebrou varias concentracións diante do Concello para reclamar a mediación do Goberno. A portavoz de CA, Marta Lois, e o concelleiro Xan Duro participaron nesta reunión, “que nos deixa moitas dúbidas sobre o labor de control que o Goberno de Bugallo está a facer sobre as empresas que xestionan os servizos públicos”.
O comité de empresa de Urbaser vén denunciando o incumprimento dos acordos coa concesionaria do servizo de recollida do lixo para a renovación do persoal eventual e o despedimento de dúas persoas como represalia durante as negociacións do convenio colectivo. O persoal asegura que Urbaser deixou de cubrir as baixas con traballadores que levaban ata catro anos vinculados á empresa, “co único obxectivo de aforrar custos”, e denuncia que se está a incumprir o prego co que se adxudicou o actual contrato. Segundo sinala, “a oferta coa que Urbaser resultou adxudicataria falaba de 157 traballadores e traballadoras, e a día de hoxe son ao redor de 120”.
Deficiencias no servizo
O persoal de Urbaser explica que a situación “está repercutindo nunha mala prestación do servizo, porque non se cubren as baixas, non hai brigadas abondo para efectuar a limpeza dos barrios, e nin sequera hai reforzo polo traballo extra que supón a celebración do Ano Santo”.
Ademais, o comité de empresa advirte doutros incumprimentos do prego do actual contrato do servizo de recollida do lixo e limpeza viaria, no que tén que ver cos recursos materiais. Así, denuncian que o atraso na entrega dos novos camións, recoñecido polo alcalde, tradúcese no deterioro dalgúns dos novos contedores que sí foron instalados na cidade, e que non son compatibles cos vehículos actuais. Tamén aseguran que o plástico da zona histórica non se está a recoller por separado, senón que este tipo de desperdicios acaban no contedor verde.
O concelleiro Xan Duro incidiu na necesidade de que “o Goberno asuma un maior control sobre as contratas, e máis cando falamos dun servizo cuns custos millonarios como é o da recollida do lixo”. O edil de Compostela Aberta reclamou medidas “para garantir o estrito cumprimento das condicións ofertadas pola empresa, tanto no que ten que ver coa calidade do servizo que se lle presta á cidadanía como no relativo ás condicións do persoal”. Para Duro, “o alcalde non pode seguir argumentando que o Goberno non pode meterse na relación da empresa cos traballadores, porque o certo é que o servizo é municipal e a concesionaria fíxose co contrato en base a unha oferta na que tamén se recollen as condicións do persoal e o número de traballadores e traballadoras que estarán adscritos ao servizo”