A Xunta de Galicia, a través da Axencia Galega de Infraestruturas, vén de responder ás alegacións que o grupo municipal de Compostela Aberta presentou ao proxecto da senda ciclista do Milladoiro, asumindo a necesidade de anular o tramo que discorría pola contorna da Colexiata de Sar. Esta era unha das demandas de CA, que rexeitaba que o itinerario afectara a espazos de gran valor natural, paisaxístico e cultural. Diante, disto, o Goberno Galego sinala que no trazado se aproveitará “o viario existente que discorre paralelo á vía do ferrocarril entre a rúa de Clara Campoamor e a rúa de Sar, tal e como se solicita na alegación”.
A portavoz municipal de Compostela Aberta, María Rozas, mostrou a súa satisfacción “porque a Xunta recúe e asuma a petición de CA, que tamén era a demanda doutros colectivos e entidades como Espazo Veciñal de Sar”. Ao tempo, a concelleira lamentou que o Goberno galego rexeitara a solicitude de Compostela Aberta para ampliar a senda ata a estación da Sionlla, para conectala coa futura Vía Verde. Rozas tamén reclamou receptividade da Xunta diante doutras alegacións de CA, referidas ao contorno do Banquete de Conxo ou ás afeccións da senda en zonas de risco de inundación sinaladas polo Ministerio de Transición Ecolóxica.
Proxecto moi mellorable
Para María Rozas, “semella claro que a Xunta de Galicia non foi previsor na elaboración deste proxecto, porque resulta sorprendente que teñan que ser entidades veciñais ou grupos políticos como Compostela Aberta os que alerten das afeccións que terían nun ben catalogado como é a Colexiata de Sar e en toda a súa contorna”. A portavoz municipal de Compostela Aberta pediulle ao Goberno “que estude aínda novas melloras na senda ciclista do Milladoiro, porque unha actuación na que se van investir 12 millóns de euros e que responde a unha longa demanda non pode acabar sendo decepcionante e converterse nunha oportunidade perdida que ademais teña graves consecuencias para o patrimonio natural”. Neste sentido, Rozas reiterou que “para Compostela Aberta, esta non é a senda que se precisa para conectar O Milladoiro con Santiago, porque non está concibida como vía de comunicación para o fomento da mobilidade sostible, un dos obxectivos do Pacto Local pola Mobilidade e do novo Plan de Mobilidade Urbana Sostible”.
