A colaboración, a transparencia e a lealdade institucional foron sinais de identidade de Compostela Aberta dende o primeiro día de goberno e así o seguirá sendo. Este xoves o alcalde en funcións, Martiño Noriega, e o candidato do PSOE, Xosé Sánchez Bugallo mantiveron a xuntanza para iniciar o transición despois dos resultados electorais do pasado 26 de maio.

A continuación podedes ver a nota de prensa publicada polo Concello que tamén podedes ver publicada na web do Concello:

O Goberno local en funcións e os/as concelleiros/as electos/as do futuro Executivo inician o traspaso de poderes

O alcalde en funcións, Martiño Noriega, e o candidato da lista máis votada nas pasadas eleccións e futuro alcalde, Xosé Sánchez Bugallo, mantiveron hoxe unha xuntanza para iniciar o traspaso de poderes entre os dous grupos de Goberno. Na reunión participaron os concelleiros e concelleiras do actual Goberno en funcións, así como os/as edís electos/as do PSOE nos comicios locais do pasado 26 de maio.

O alcalde en funcións explicou que a xuntanza “segue a unha serie de contactos informais que se veñen mantendo nos últimos días, e ten como obxectivo realizar un traspaso de responsabilidades que pretende ser exemplar, tal e como merece a institución da capital de Galicia”. Para iso, o Goberno en funcións fixo entrega de ata 25 informes técnicos de distintas áreas municipais, realizados por persoal responsable das xefaturas de servizo e de sección, das direccións de área e das xerencias dos organismos e empresas participadas polo Concello de Santiago.

Ademais, tal e como apuntou Martiño Noriega, “todos os concelleiros e concelleiras en funcións puxéronse a disposición dos novos edís, para dar conta da situación de cada área concreta e dos expedientes que queiran coñecer máis en detalle”. O rexedor en funcións asegurou que a xuntanza discorreu “nun ambiente de total cordialidade, tal e como debera ser a norma en todas as institucións e en todos os traspasos de responsabilidades”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies