- CA tamén reclama medidas para garantir a seguridade no contorno do edificio en ruínas do número 73 de Sánchez Freire
Compostela Aberta trasladará no próximo Pleno a preocupación da veciñanza de Conxo pola situación na que se atopa o muro de peche do cemiterio, cara a rúa da Fervenza. Esta estrutura, explicou o concelleiro Jorge Duarte, “pasou a funcionar como muro de contención tras as obras de construción do campo de fútbol, e presenta problemas de conservación desde hai tempo, que poderían supoñer un risco para a seguridade”.
No Pleno da próxima semana, Compostela Aberta preguntarálle ao Goberno local polas medidas que vai adoptar para garantir a seguridade e mellorar o estado de conservación do muro da rúa da Fervenza, en Conxo. Tal e como lembra o concelleiro Jorge Duarte, “o Goberno conta cun informe desde decembro de 2019, no que o Consorcio xa informaba da situación dos muros do barrio de Conxo. En concreto, sobre o muro cara a rúa da Fervenza, o documento advertía que “na cara interna pódese observar algunha protuberancia e algunha fenda. Ademais algunhas áreas parecen non ter protección superior”, e tamén urxía a obrigarlle á propiedade a retirar a vexetación da cara externa, que impide coñecer ben o estado da estrutura. Duarte incidiu en que “a veciñanza do barrio de Conxo vén mostrando a súa preocupación polo estado deste muro, e urxe que o Goberno local adopte algunha medida para garantir a seguridade, nunha zona que é moi concurrida”.
Casa en ruínas
Tamén relacionado co barrio de Conxo, Compostela Aberta pinsta ao Goberno a adoptar as medidas necesarias para garantir a seguridade na contorna dun edificio en ruínas, situado no número 73 da rúa de Sánchez Freire. Jorge Duarte explicou que “este inmoble supón un evidente perigo, ademais de xerar problemas de salubridade e de saúde pública por mor das pragas habituais neste tipo de edificacións abandonadas”. Para Duarte, “o Concello debe actuar de inmediato, ben sexa promovendo a derruba do edificio, ou ben adoptando todas as medidas de seguridade que sexan necesarias e que tamén veñen sendo demandadas pola veciñanza”.
PODES CONSULTAR AQUÍ A PREGUNTA DO GRUPO MUNICIPAL DE COMPOSTELA ABERTA SOBRE MURO DE PEDRA DA RÚA DA FERVENZA NO BARRIO DE CONXO
PODES CONSULTAR AQUÍ O ROGO DO GRUPO MUNICIPAL DE COMPOSTELA ABERTA SOBRE A CASA EN RUÍNAS NA RÚA SANCHEZ FREIRE Nº 73